Igl è sonda la damaun, l'aria è miaivla. Sper la via principala, che maina tras Glion, stat ina tenda blaua cun il text «MENZLI SPORT». Quai è il lieu da rimnada per velos che na vegnan betg pli duvrads. Il club da velos Surselva ha organisà l'acziun cun Menzli Sport e cun l'organisaziun «Velafrica».
Dus umens prendan encunter ils velos – Guido Schweizer, il president dal club da velo Surselva e Devin Casutt, emprendist en il terz onn tar Menzli Sport a Glion. «Nus rimnain tut ils velos qua per trametter quels suenter vinavant ad in'organisaziun en Svizra», », di Guido Schweizer. L'emprim tramettian els ils velos tar in mecanist, e da là giaian ils velos tar «Velafrica».
Nus acceptain bunamain tut – tut quai che po anc funcziunar prendain nus
«Velafrica» regala quests velos ad uffants ed a famiglias da l'Africa. Tranter auter portan els velos a Madagascar, a Burkina Faso, a Ghana ed en l'Africa dal Sid. Menzli Sport rimnia mintga di da l'onn velos, ch'els tramettian alura duas giadas l'onn a «Velafrica» – ma questa acziun è speziala, perquai ch'els han vulì ina pli gronda attenziun, e per quai han els era collavurà cun il club da velo Surselva.
-
Bild 1 von 2Legenda: Cun tatgaders mellens vegnan marcads ils velos, e cun stritgs quintan els quants velos ch'els han gia survegnì. RTR
-
Bild 2 von 2Legenda: Quests tatgaders tatgan vi da tut ils velos donads. RTR
Dapi trais uras pon ins gia purtar velos, ed enfin uss han els rimnà passa 45 velos. Guido Schweizer spera ch'els vegnian sin pli che 100, ma el saja cuntent cun tut. L’ultima giada haja el organisà insatge sumegliant avant bunamain 20 onns. Quest onn haja el pensà, ch'i saja puspè uras da far quai.
Las persunas che portan lur velos èn fitg differentas, uschia er lur raschuns per regalar il velo. Ina dunna pli veglia, cun in nov velo verd per la citad cun in chanaster, di per exempel, ch'ella dovria memia darar il velo, perquai ch'ella na lavuria betg pli.
Jau na lavur betg pli e lura na dovrel jau era betg pli il velo, ed insatgi en l'Africa avess forsa gugent in.
Auters velos èn da parents morts, d'uffants ch'èn daventads memia gronds per lur velos u simplamain da persunas, che na van betg pli uschè savens cun velo sco pli baud.
-
Bild 1 von 2Legenda: Da grond enfin pitschen datti per tuts in velo. RTR
-
Bild 2 von 2Legenda: Ella garascha da Menzli Sport stattan tut ils velos ch'els han rimnà. RTR
I ha velos fitg differents – velos d'uffants colurads, velos ch'èn uschè vegls ch'els èn prest antics e velos da muntogna. Insatge han dentant tut ils velos cuminaivel, numnadamain ils tatgaders mellens cun l'inscripziun «Velafrica». Guido Schweizer e Devin Casutt explitgan, che quai è il logo da «Velafrica», e ch'igl è probablamain era pensà sco reclama per els.
Tut ils velos vegnan deponids en la garascha da Menzli Sport. Da là vegnan els tramess vinavant duas giadas l'onn: l'emprim tar in mecanist, suenter tar «Velafrica» e da là directamain tar persunas che dovran in velo en l'Africa.