Dapi tschintg onns fa il Sursilvan ensemen cun sia dunna il pur en la Tschechia. Quai en in vitget cun radund 20 abitants, en la regiun da Pilsen datiers dal cunfin tudestg. Ils ultims dis, spezialmain la fin d'emna, sajan stads intensivs cun la plievgia, declera el via telefon. Malgrà ch'i dettia adina puspè ferma plievgia en la regiun nua ch'els abitan, n'haja el anc mai vis uschè insatge.
Il dutg che va tras il vitg e sur nossas pastiras è daventà in flum. Uschia insatge n'hai jau anc mai vis.
Tschaler plain aua e plontas crudadas
Cunquai ch'els hajan bisons ed er chavals, saja tranter auter stà da guardar dals animals ils ultims dis. Plinavant hajan els era gì tschalers plain aua. Quasi senza pausa è Sandro Maissen uschià stà vi da pumpar ora il tschaler.
In dals gronds privels sajan plinavant plontas crudadas stadas, cunquai ch'i haja bler guaud enturn il vitget nua ch'els abitan. Plontas sajan crudadas sin las saivs per ils animals, e la dunna haja gì cletg ch'ina plonta saja crudada gist sper ella, cura ch'ella era vi da guardar dals chavals, raquinta il Sursilvan.
Dapi mardi fai bell'aura en la Tschechia. La situaziun saja uschia er sa calmada. Ed insumma manegia Sandro Maissen ch'els hajan gì fortuna cumpareglià cun autras regiuns en la Tschechia u era guardà cun l'Austria.