Anc adina blera glieud che vul prender cumià da Papa Francestg che giascha en dom da Son Peder. Anc enfin venderdi saira pon cartentas e cartents prender cumià al vaschè avert. Da las 07:00 enfin las 19:00 è la basilica en il Vatican anc averta. Enfin ussa han dieschmillis persunas gia rendì la davos onur a Papa Francestg. Venderdi saira vegn il vaschè serrà durant ina ceremonia solenna enturn las 20:00. Ina ceremonia manada dal camerlengo Kevin Farrell.
Ils paupers han in plaz priviligià en il cor da Dieu.
Per la ceremonia da sepultura che cumenza sonda a las 10:00 èn gia 130 delegaziuns da l'entir mund s'annunziadas. Quai communitgescha il secretariat statal dal Vatican. Ultra da quai vegnan era radund 50 schefs da stadi u regenza ad esser preschents e 10 monarchs. Per la ceremonia da sonda spetgan ils responsabels fin a 200'000 cartentas e cartents. E sin giavisch expressiv vegnian era ad esser preschentas persunas main bainstantas e flancar la processiun sin la stgala a la basilica papala Santa Maria Maggiore per render la davosa onur a papa Francestg, scriva il Vatican e punctuescha la maxima dal papa defunct.
Las medias dal Vatican live da Roma
La sepultura vegn organisada: Sco emprim vegn il Vatican ad organisar la sepultura. Francestg aveva dà instrucziuns detagliadas per la sepultura. Uschia na vegn el betg mess en bara sco ses antecessurs en la baselgia da Son Peder, sin l'uschenumnà Katafalk.
La bara da papa Francestg na vegn pia betg pli ad esser vesaivla libramain, mabain mo anc en il vaschè avert. La bara da papa Francestg na vegn era betg messa sco usità enfin ussa en trais vaschels differents, mabain mo en in, ed el na vegn era betg sepulì en la baselgia da Son Peder.
Santa Maria Maggiore sco lieu final: Il papa da l'Argentina ha disponì da vegnir sepulì en in'autra baselgia da Roma, numnadamain en la baselgia da Santa Maria Maggiore. Francestg aveva adina ina relaziun zunt stretga cun questa baselgia deditgada a Maria. Avant mintga viadi pli grond a l'exteriur è el sa rendì là per urar. Per la sepultura dal papa vegnan spetgads schefs da stadi e da regenza da tut il mund.
Co vai suenter la sepultura vinavant?
Il successur vegn tschertgà: Suenter il funeral èsi da nominar in successur. Dretg d'eleger han ils cardinals che n’han anc betg 80 onns. Quai èn 141 cardinals (stadi december 2024). A quels appartegnan dus cardinals da la Svizra, Kurt Koch ed Emil Paul Tscherrig. Ensemen cun ils auters cardinals cun dretg d’eleger vegnan els ad eleger il papa nov.
Conclave: Pli baud durava quai mintgamai emnas fin ch'ils cardinals da tut il mund eran viagiads a Roma. Oz è quai pussaivel entaifer paucs dis. Per regla cumenza in conclave 15 fin 20 dis suenter la mort dal papa. L'elecziun vegn fatga en l'uschenumnà conclave che ha lieu davos portas serradas en la chaplutta sixtina en il Vatican. Ils cardinals èn cumplettamain isolads dal mund exteriur – per evitar ch'els vegnian influenzads. Là restan els fin ch'igl èn d'accord tgi che duai daventar il nov parsura da la baselgia catolica. Durant quest temp n'èsi betg lubì als cardinals d'avair contact cun persunas ordaifer dal conclave. Era gasettas, televisiuns e radios èn scumandads.
Fim nair u alv: suenter mintga scrutini communitgeschan ils cardinals cun segns da fim, sch'els han gia elegì in nov papa. Fim nair vul dir: anc nagin ha cuntanschì la maioritad necessaria da dus terzs. Fim alv percunter mussa: l'elecziun ha gì success. Savens dovri numerus scrutinis ed in conclave po durar plirs dis.
Nov papa cumpara sin la plazza da Son Peder: Tgi ch’è il nov Pontifex Maximus, vegn il mund a savair live sin la plazza da Son Peder, curt suenter sia elecziun. Sin la loggia (sin balcun) da la baselgia da Son Peder cumpara il nov elegì gia en il vestgì papal. El vegn annunzià cun ils pleds latins: habemus papam – nus avain in papa.
Sco favurit per la successiun da papa Francestg vala per blers il cardinal talian Pietro Parolin. Il spiritual da 70 onns ha assistì a papa Francestg gia dapi var 10 onns sco secretari dal stadi cardinal. Là era Parolin responsabel per la diplomazia internaziunala.
Igl è dentant fitg grev da prevesair la decisiun da la proxima elecziun, perquai ch'i ha uschè blers cardinals novs en il conclave.