Chancelier tudestg Olaf Scholz (SPD) e vicechancelier Robert Habeck (verds) visiteschan uffizialmain il Canada per trais dis. Il motiv per questa visita lunga èn interess da la Germania d'approfundar las relaziuns economicas cun il Canada. Pervi da la guerra en Ucraina vul la Germania vegnir independenta dal gas russ. Sco alternativa per la Russia vuless il pajais gudagnar il Canada sco partenari d’energia. Il Canada offra gas liquid, dentant po la Germania pir profitar da quel a media vista cura che l'infrastructura da transport sco pipelines e terminals è vegnida bajegiada.
Tar il viadi da Scholz è perquai il focus sin la producziun d'idrogen. En ils proxims dis vegnan Olaf Scholz ed il premier canadais Justin Trudeau a suttascriver ina cunvegna da cooperaziun tar la producziun e transport dad idrogen verd. En pli ha l'economia tudestga grond interess da minerals sco cobalt, nichel, grafit e litium. Quai èn minerals impurtants per la producziun da battarias.
