L'Europa vegnia confruntada ils proxims mais cun seriusas sfidas tar il provediment d'ieli e gas. L'enviern en l'Europa vegnia probavel fitg fitg grev, avertescha Fatih Birol, il directur da l'agenzia d'energia internaziunala durant in forum d'energia a Sydney. Il mund n'haja anc mai vis ina crisa d'energia uschè profunda e cumplexa. Quella vegnia ad avair effects serius sin l'economia mundiala.
Sco ultim è il quità d’ina crisa d’energia sa rinforzà suenter che la Russia ha serrà l’impurtanta pipeline da gas Nord Stream 1 pervi da lavurs da mantegniment. Dapi glindesdi endamaun na va nagin gas pli tras la lingia en Germania. I dat la tema che la pipeline na vegnia betg puspè messa en funcziun suenter las lavurs.
En vista a la midada sin energias regenerablas per sminuir la dependenza da la Russia ha il directur fatg allusiun a la China. Quella controlleschia bun 80% da tut las chadainas da furniziun per energia solara.
