Tenor la Chas'alva haja Trump telefonà cun il retg da l’Arabia Saudita Salman per punctuar quant impurtant ch’i saja, ch’ils Stadis dal Golf furmian in’unitad. Quai tant per cumbatter il terrorissem sco er per stabilisar l’entira regiun.
Stadis Unids na vulan betg prender partida
Ils Stadis Unids na veglian betg prender partida en il conflict tranter il Katar ed ils auters pajais al golf, ha ditg ina pledadra da pressa dal ministeri da l’exteriur american. Il minister da l’exteriur american Rex Tillerson haja sa declerà pront dad intermediar tranter ils stadis. La relaziun dals Stadis Unids tar Katar restia vinavant ferma, ha intunà la pledadra vinavant.
Paucas uras avant lauda Trump il boicot
Paucas uras avant aveva Trump anc ludà, ch’il Katar vegn boicottà e numnà quai in resultat da sia visita en la regiun e si’atgna politica dal Proxim Orient:
Forza saja quai schizunt «il cumenzament da la fin dal horror dal terrorissem» concluda il president american:
L’Arabia Saudita e ses alliads Bahrain, Egipta ed ils Emirats Arabs Unids avevan rut giu il glindesdi surprendentamain lur contacts diplomatics cun il Katar. Els han argumentà tranter auter cun colliaziuns da Katar tar «organisaziuns terroristicas».
«Fake news» en discussiun sco ragisch da la controversa al Golf
L’emettur american CNN rapporta entant sa referind a circuls dal servetsch secret american, che hackers russ hajan plazzà in’istorgia da novitads faussas, da «fake news» tar l’agentura da novitads uffiziala dal Katar.
Quella novitad faussa saja stada la raschun per che l’Arabia Saudita ed auters pajais han rut giu lur contacts diplomatics cun il Katar.
Sche las reproschas a l'adressa dals Russ sa cumprovan, mussia quai ch'ils Russ emprovan da sutminar la politica externa dals Stadis Unids.