Ils 7 impurtants pajais industrials vulan far dapli per cumbatter il terrorissem.
Quai è in dals paucs puncts nua che la gruppa dals stadis G7 sa mussa unida, tar lur inscunter a Taor-mina sin l'insla Sicilia. Quasi da la medema opiniun èn ils schefs da stadi tar ils temas Siria e Corea dal Nord.
Per grondas differenzas procura il president american Donald Trump, quai che pertutga mesiras cunter la midada dal clima, il commerzi liber e dumondas davart fugitivs e migrants.
Trump sa decida pir suenter G7 davart cunvegna da clima
Perquai che Trump vul sa decider pir suenter l'inscunter dals G7 sch'el vul sortir la cunvegna da clima da Paris, ha la chanceliera tudestga Angela Merkel nizzegià la chaschun per appelar a Trump. Er auters schefs da stadis vulan che Trump sa tignia vi da las finamiras messas davart l'emissiun da gas cun effect da serra.
Trump vul ch'il commerzi liber restia restrenschì
Tar il commerzi liber è Trump restà tar ses curs d'isolaziun. El crititgescha fermamain la Germania ch'els vendian dapli che quai ch'els cumprian en ils Stadis Unids. Gia en ils discurs precedents dals ministers da finanzas ha la decleraziun usitada dals G7 da vulair cumbater il protecziunissem fatg naufragi pervi dals Stadi Unids ch'èn sa mess encunter.
Trump fraina la politica da fugitivs
En la politica da fugitivs ha Donald Trump impedì in plan extendì per dumagnar la crisa da fugitivs ed haja uschia offendì il giastader Italia. En il communitgà final vegn pervi dals Stadis Unids piglià si be ina curta passascha pervi da fugitivs che pertutga dumondas da segirezza. En sasez aveva l'Italia vulì formular ina decleraziun communala davart ils aspects positivs da l'immigraziun e per dumagnar meglier la crisa da fugitivs.
Il tema fugitivs duai anc ina giada giugar ina pli gronda rolla il segund di. Là duain represchentants dals pajais africans vegnir natiers. Il president talian, Paolo Gentiloni less lura discurrer davart migraziun ed il cumbat cunter fomaz.
Organisaziuns da svilup pretendan ch'ils G7 fetschian a la fin da l'inscunter novas empermischuns per l'appell d'agid da l'ONU per 6,9 milliardas dollars. Enfin uss han els confermas che cuvieran be radund 30% dals custs.
RR novitads 06:00