- Joe Biden na va betg en la cursa per la presidenza il november.
- Sco suppleanta propona el sia vicepresidenta Kamala Harris.
- Harris ha gia confermà da vulair candidar per ils democrats.
Il president dals Stadis Unids Joe Biden na candidescha betg pli per in'ulteriura perioda d'uffizi quest november. Quai ha il democrat communitgà en las medias socialas. Las ultimas emnas era l'um dad 81 onns adina vegnì pli fitg sut squitsch pervia da sia vegliadetgna ed era pervia da sia sanadad. E quai era da sia atgna partida, plirs represchentants dals democrats avevan appellà a Biden da sa retrair.
En il statement ch'è vegnì publitgà la dumengia saira scriva Biden: «Igl è stà la pli gronda onur da dastgar esser voss president. Malgrà ch'jau aveva l'intenziun da vegnir reelegì pens'jau ch'igl è en l'interess da mia partida e dal pajais ch'jau ma retira e ma concentresch per la fin da mes temp d'uffizi sin mias incumbensas sco president».
Biden ha er annunzià ch'el vegnia ad explitgar pli tard ils motivs per questa decisiun. Ils democrats ston uss ir a la tschertga dad in nov candidat u ina nova candidata per las elecziuns dal november, pia in cuntracandidat a l'anteriur president Donald Trump. Biden sez ha communitgà ch'el propona la vicepresidenta Kamala Harris sco candidata.
Harris è pronta per la sfida
Kamala Harris ha gia confermà da vulair ir en la cursa per la presidenza il november. L'ultim pled en chaussa han dentant ils delegads e las delegadas da la partida da tut ils stadis federativs. Pliras medias rapportan dentant che Harris haja gia paucs dis suenter sia annunzia avunda vuschs sin segira.
La vice-presidenta americana persequiteschia sumegliantas finamiras politicas sco il president actual Joe Biden. Quai di ina schurnalista da la NZZ ch'ha scrit in cudesch davart Harris. Harris saja ina politicra moderada. Avess ella da daventar presidenta dals Stadis Unids, vegnia ella segir a cuntinuar cun ils programs socials en ils Stadis Unids, da s'engaschar per la protecziun dal clima e l'Ucraina.
En ses emprim pled sco eventuala candidata per la presidenza, ha Harris declerà sias finamiras. Ella sa presenta sco «candidata per il futur» – betg sco il moviment enturn Trump che vulia plitost ir «enavos en il temp». En il center da ses cumbat electoral fissan temas sco il dretg da l'abort e leschas d'armas pli severas. Plinavant vai per rinforzar la classa sociala mesauna.
Reacziuns dals democrats e da Donald Trump
Il pledader dals democrats en il senat, Chuck Schumer, ha respectà la decisiun da Biden. El na saja betg mo in grondius president, mabain er ina persunalitad remartgabla. Ulteriurs democrats, era quels ch’han fatg squitsch sin el, han uss ludà el per sias prestaziuns e per sia decisiun da far plaz ad in auter candidat u in’autra candidata.
Il candidat dals republicans, Donald Trump, ha era reagì sin l’annunzia da Biden – e quai a moda vilada e senza respect. Sin sia plattafurma «Truth Social» ha el numnà Biden ina persuna corrupta che na saja betg abla da candidar anc ina giada. En pli saja el era mai stà abel d’exercitar l’uffizi. El ha renfatschà a Biden da be esser daventà president avant quatter onns grazia a fake news e manzegnas.
Reacziuns internaziunalas
Suenter che Biden ha annunzià da betg pli candidar, ha era la cuminanza internaziunala ludà sia decisiun: Il chancelier tudestg Olaf Scholz ha numnà Biden in ami ch’haja cuntanschì bler. Sut el sajan ils Stadis Unids stads in partenari fidaivel. Il president ucranais Wolodimir Selenski ha engrazià a Biden per ses sustegn en il cumbat cunter ils invasurs russ. Il nov primminister da la Gronda Britannia, Keir Starmer, ha ditg ch’el respectia la decisiun da Biden. En pli sa legria el sin la collavuraziun durant il temp restant. Il Cremlin ha annunzià d’observar bain la situaziun en ils Stadis Unids. Biden saja stà in candidat calculabel. Ils proxims quatter mais possia anc capitar bler.
81 milliuns dollars per ils democrats
Dapi che Joe Biden ha annunzià da tuttina betg candidar per in’ulteriura perioda d’uffizi, han ils democrats profità da donaziuns da 81 milliuns dollars. Quai ha communitgà il team enturn Kamala Harris. Tenor els saja quai ina summa da record entaifer 24 uras.
