Mintga generaziun haja in mument en il qual ella stoppia defender la democrazia e la libertad. «Jau crai, quest è il noss», scriva Biden. «Perquai candidesch jau per vegnir reelegì sco president dals Stadis Unids.» Vitiers ha il president dad 80 onns mussà in video da trais minutas. Là avertescha el: «Ans laschai finir la lavur.»
Biden aveva gudagnà l'elecziun 2020 encunter Donald Trump, ch'era da quest temp il president dals Stadis Unids. Biden è en uffizi dapi il schaner 2021 ed è lura ì sco il pli vegl president insumma en la Chasa alva. Tar las proximas elecziuns ha el lura 81 onns. A la fin d'ina proxima perioda d'uffizi avess el lura 86 onns.
Controvers er en l'atgna partida
En ils Stadis Unids po in president far sulet duas periodas d'uffizi. Sche quellas seguan ina suenter l'autra u betg, n'emporta betg. Entaifer la partida democratica hai dà grondas discussiuns sche Biden è il dretg candidat, gist pervi da sia vegliadetgna. En enquistas ha Biden pers blera simpatia. Ma sia regenza ha gì l'ultim temp intgins success ed han er gudagnà intgins sezs en las elecziuns en il congress, il november passà. Quai ha puspè fermà in zic la posiziun da Biden.
Biden fa gia dapi 35 onns politica ed era avant en il senat. Dal 2009 fin il 2017 è el stà il vicepresident da l'emprim president da pel stgira, Barack Obama. Quatter onns pli tard ha el lura gudagnà l'elecziun encunter Donald Trump.
Grevs tumults suenter sia elecziun il 2020
Sia victoria il 2020 è vegnida sumbrivada da gronds tumults politics. Trump è sa dustà d'acceptar sia terrada envers Biden. El pretenda che Biden ha be pudì gudagnar pervi da cugliunarias massivas. Per questa pretensiun n'ha el dentant betg pudì preschentar mussaments. La campagna da Trump è lura culminada ils 6 da schaner 2021 en l'uschenumnà «assagl dal Capitol» a Washington – nua che aderents da Trump han assaglì l congress dals Stadis Unids. Sis persunas han pers lur vita quel di.
Er Trump vul puspè candidar
Er l'anteriur president, Donald Trump vul candidar anc ina giada per il presidi. L'um da 76 onns aveva annunzià quai gia il november da l'onn passà. Ils republicans spetgan ina vasta retscha da candidaturas. En cumparegliaziun cun auters candiats da la partida, giascha Trump lunsch davant – malgrà tut ils scandals da l'ultim temp.
