1,1 milliuns Palestinais e Palestinais duain bandunar il nord da Gaza las proximas 24 uras e translocar en il sid da la strivla da Gaza. Il militar israelian haja infurmà las Naziuns Unidas en chaussa.
«Las Naziuns Unidas èn da l'avis ch'i na saja betg pussaivel da realisar in tal moviment senza consequenzas umanitaras desastrusas», uschia il pledader da l'ONU Stéphane Dujarric en ina decleraziun.
La situaziun che saja tuttina gia tragica possia sa sviluppar ad ina catastrofa, sche quest cumond na vegnia betg retratg. Il cumond dal militar israelian vala er per tut ils collavuraturs da l'ONU e quels ch'èn plazzads en instituziuns da l'ONU sco scolas, centers da sanadad e clinicas.