Pervia da la pandemia saja bain vegnì producì bun 5% damain CO2, sin la concentraziun dal gas da serra en l'atmosfera n'haja quai però strusch gì in effect. Sch'i na vegnia betg prendì mesiras cleramain pli strictas per proteger il clima vegnia manchentada la finamira da la cunvegna dal clima da Paris da limitar il stgaudament sin 1,5 fin 2 grads. Quai di Petteri Taalas, il schef da la WMO.
CO2 è responsabel per radund dus terz da l'augment da temperatura mundiala. Avant dus fin tschintg milliuns onns era la concentraziun da CO2 en l'atmosfera la davosa giada uschè auta sco ussa. La temperatura era radund dus fin trais grads pli chauda e la mar tranter 10 e 20 meters pli auta.
Nus na dastgain betg perder dapli temp.
Per cuntanscher la finamira da 1,5 grads stoppia il mund daventar neutral al clima tranter 2050 e 2070. La dumengia entschaiva la conferenza da clima COP26 a Glasgow. Taalas appelescha als participants d'avisar anc pli rigurusas mesiras da protecziun per il clima.
