La PS grischuna è sa decidida da desister d'ina segunda candidatura. Oriundamain aveva la partida annunzià da ponderar quai per il cas ch'i na dettia naginas dunnas che candideschian. Suenter che l'Allianza dal Center ha decis dad ir en il cumbat cun Carmelia Maissen , saja la situaziun sa midada. Discurs en las atgnas retschas sco er in'analisa da ristgs e schanzas hajan lura manà a la conclusiun dad ir be cun lur cusseglier guvernativ en uffizi, Peter Peyer, en il cumbat electoral, communitgescha la PS. La partida è da l'avis ch'ina candidatura dubla da lur vart attatgassia cunzunt quella da Carmelia Maissen.
1 dunna e 5 umens sa mettan en il cumbat per l'elecziun dals 15 da matg 2022:
- Peter Peyer (en uffizi, Partida socialdemocratica)
- Carmelia Maissen (nova, Allianza dal Center)
- Jon Domenic Parolini (en uffizi, Allianza dal Center)
- Marcus Caduff (en uffizi, Allianza dal Center)
- Martin Bühler (nov, Partida liberaldemocratica)
- Roman Hug (nov, Partida populara)
Cun dapli dunnas en il Cussegl grond
Per la Partida socialdemocratica dovri però dapli dunnas en la politica ed en la regenza. La basa per quai vegnia messa tar las elecziuns dal Cussegl grond. Qua veglia la partida candidar cun uschè bleras dunnas cun bunas schanzas sco pussaivel. La finamira saja d'avair glistas equilibras – sche pussaivel cun tantas dunnas sco umens. La PS appellescha a las autras partidas dad era metter ina tala finamira.