Ensemen cun ils dus cussegliers guvernativs vertents, Marcus Caduff e Jon Domenic Parolini, è Carmelia Maissen proponida da la suprastanza da sia partida, l'Allianza dal Center. Mario Cavigelli sto banunar ses post pervi da la limita dal temp d'uffizi. Perquai che las autras partidas hajan manchentà la schanza da proponer dunnas per in post en la regenza grischuna, saja la partida sa decidida da proponer a lur delegadas e delegads Carmelia Maissen.
In'elecziun per la regenza grischuna senza ina candidatura d'ina dunna è impussibel per nus.
Presidenta communala e deputada
Carmelia Maissen haja ina gronda exprientscha politica: Dasper ses post sco presidenta communala da Glion è ella er dapi il 2018 deputada en il Cussegl grond. Sco presidenta haja ella gì la sfida da metter en urden las finanzas da la vischnanca da Glion suenter la fusiun ed er da realisar la revisiun da la planisaziun locala. Cun la sursilvana da 44 onns vul la partida dar in cler signal en chaussa represchentaziun da las dunnas en la regenza.
Jau n'hai nagin problem d'esser la quota da dunnas aifer la runda dad umens che candideschan enfin uss. Jau hai dentant era il dretg sacados politic e professiunal per quest'incarica.
Forzas cumprovadas per sfidas vegnentas
Ch'ils dus cussegliers guvernativs actuals Marcus Caduff e Jon Domenic Parolini stattan vinavant a disposziun, era gia enconuschent. Els hajan cumprovà en la legislatura vertenta ch'els hajan las dretgas cumpetenzas per manar, argumentescha l'Allianza dal Center. Er en il temp grev da la pandemia hajan els mussà curascha e sajan s'engaschads per il svilup dal chantun.
Il minister d'economia Marcus Caduff accentuescha ch'i na saja nagin problem d'avair dus candidats da la Surselva – quai na gioghia betg pli uschè ina gronda rolla. Il minister d'educaziun Jon Domenic Parolini sa posiziunescha perencunter gia sco unic represchentant da l'Engiadina.
Strategia da trais – strategia da risico?
La giunta da l'Allianza dal Center ha stuì discutar pliras dumondas avant che fixar la strategia. Ina da quellas: Ir cun duas ubain trais persunas en il cumbat? Cun dus veders ed ina dunna, saja la partida sa decidida da porscher ina schelta al suveran ch'elegia la regenza grischuna. Quai ha la co-presidenta Aita Zanetti accentuà envers RTR.
La radunanza per nominar definitivamain ils candidats e las candidatas per las elecziuns, ha lieu il cumenzament da december. Las elecziuns èn ils 15 da matg 2022. Enfin uss èn enconuschent ils suandants nums per la regenza:
