La chasa editura Somedia a Cuira surpiglia la chasa editura Montabella da San Murezzan. Quai communitgescha Somedia glindesdi. L'editur da Montabella, Max Weiss, chala suenter 41 onns e surdat la chasa editura il prim da matg 2022 a Somedia.
Montabella
La chasa editura è vegnida fundada 1980 a San Murezzan ed è spezialisada sin products turistics. Tranter auter producescha Montabella cartas postalas e fotografias da reclama e da cuntradas. Plinavant hani in'agentura per fotografias. La Bregaglia e l'Engiadina èn las regiuns centralas. La chasa editura era oriundamain ina filiala da la stamparia Grafiscrit SA a Puntraschigna, ch'è vegnida surpigliada 1993 da la Gasser-Gruppe, oz Somedia.
Somedia
La chasa editura Somedia cumpiglia las ediziuns «Somedia», «Terra Grischuna» e «Rüegger». Ella edescha cudeschs da divers temas. Tranter auter guids da viandar e chalenders annuals.
Ils cudeschs da la chasa editura Montabella cumparan davent dal prim da matg sco ediziun «Montabella» tar Somedia.
