Per tge vai?
En il center da la seria stat la famiglia Durisch, possessura e gestiunaria da la pli gronda chasa da medias dal Grischun. Cura ch'il patrun e fundatur Gion-Peder (Elmar Deflorin) mora, cumenza in cumbat da pussanza entaifer la famiglia. En ses testament ha Gion-Peder resguardà sia biadia Ladina (Annina Hunziker) che viva en l'exil turitgais. Ladina è in'activista incharnada che s'engascha vehementamain per ils dretgs dals animals e la protecziun dal clima – tematicas che fruntan sin resistenza en la chasa da medias tradiziunala. Ma gist ella duai ussa manar la «Posta», l'ultima gasetta rumantscha.
Questa davosa veglia da Gion-Peder na plascha tuttavia betg a ses figl Gion (Marco Luca Castelli) che vul serrar la «Posta» nunrentabla. Ladina nizzegia la chaschun da plazzar ses cuntegns en l'atgna gasetta. Ma gia prest sa chatta ella amez in morast d'intrigas e cumbats da pussanza. Per pudair publitgar ses messadis tradescha ella pass per pass ils agens ideals. A la fin dal cumbat sto Ladina guardar en ils egls a sasezza, a sia famiglia ed a la populaziun rumantscha.
Acturas ed acturs
Las rollas principalas da la seria surpiglian Annina Hunziker sco Ladina e Marietta Jemmi sco Andrietta Cadonau, la mamma da Ladina. Marco Luca Castelli gioga Gion Durisch e Noam Jenal il schefredactur da la «Posta» Corsin. En ulteriuras rollas ves'ins Elmar Deflorin sco Gion-Peder Durisch, Annina Sedlacek sco Gianna, Roman Weishaupt sco Caprez, Gina Estrada sco Thelma, Tim Theus sco Xeno, Josef Willi sco Danuser, Ursin Derungs sco Franz, Oceana Galmarini sco Maria, Esther Berther sco Silvia, Sandro Derungs sco Cla, Lukas Baumann sco Gaudenz, Claudia Bläsi sco Elisabeth, Fabian «Bane» Florin sco Tscharner e Nikolaus Schmid sco Jenni.
Nus ans legrain fitg che las lavurs da filmar cumenzan. Cun las acturas ed ils acturs per part professiunals, per part laics, èsi reussì a nus da mussar a moda multifara la lavur culturala rumantscha e grischuna.
Sophie Toth da l'interpresa Shining Film da Turitg producescha la seria da tschintg parts. Manuel Sieber ed Anne Sommer da la schau. GmbH da Cuira èn las persunas da contact al set. La reschia maina Adrian Perez, Aaron Markus Graf è responsabel per las lavurs da camera. Ils scenaris èn vegnids sviluppads en il Writer’s Room dals auturs Adrian Perez, Jen Ries e Simon Nagel.
