Tge fas ti lura durant l’entir di? Co vesa ora tes mintgadi da lavur? Tge fas lura precis? Mintgin da nus è segir gia stà confruntà cun questas dumondas. Perquai hai jau dumandà a mias collegas ed a mes collegas che fan era l'emprendissadi tar Radiotelevisiun Svizra Rumantscha RTR da scriver in curt text davart lur mintgadi:
Marco Nay (emprim onn d'emprendissadi)
La mesemna sun jau tar la direcziun. La damaun repart jau las gasettas, pli tard guard jau mes e-mails. Pli tard guard jau, sche las plantas en l’entira chasa han anc avunda aua, u sche jau hai da bagnar ellas. Cura che jau hai terminà quest’incumbensa, ma tschent jau puspè al computer e m’occup cun ils pensums dal praticum che jau fatsch cun il program da Konvink. Ina tala lavur da pratica dura var in’ura. Il suentermezdi franchesch jau ils pachets e vom adina a las 15.00 a la posta.
La gievgia sun jau en la logistica. La damaun fatsch jau il medem sco la mesemna, reparter la posta e controllar ils e-mails. Lura fatsch jau in gir tras la chasa e guard, sch’igl ha anc avunda material da biro. Chaussas che mancan nod jau e prend or dal deposit giu en tschaler. Jau stoss er adina guardar che nus hajan avunda material da biro en il deposit. Sch’i manca insatge, stoss jau empustar suenter. Las empustaziuns hai jau da far en il SAP e mia scoladra professiunala sto dar l’ok. Il suentermezdi francesch jau ils pachets e vom adina a las 15.00 a la posta.
Il venderdi sun jau puspè tar la direcziun. La damaun fatsch jau puspè il medem sco la mesemna e la gievgia (e-mails e posta). Alura rimnel jau il chartun en la chasa RTR ed al dismet en-il container. Lura ma fatschent jau cun “50:50”: jau taidl contribuziuns da radio e scriv si quantas dunnas e quants umens che han discurrì. A la fin dal mais fatsch jau ina statistica da quai. Il suentermezdi franchesch jau ils pachets e vom adina da las 15.00 a la posta. In quart avant las tschintg bandun jau la chasa RTR e vom ala staziun per ir en Surselva.
Il glindesdi ed il mardi hai jau scola, uschia che mia emna da lavur cumenza pir puspè la mesemna.
Saskia Cathomas (secund onn d'emprendissadi)
Il glindesdi lavur jau en la partiziun da musica. Là nizzegiain nus in program che sa numna PlayInfoPlus.Net. L’avantmezdi controllesch jau, sch’il sistem ha surpiglià correctamain tut ils cuntegns emess al radio. Il suentermezdi dastg jau lavurar in’ura vi da mias incumbensas dals curs ordaifer il manaschi (ük). Lura surpigl jau l’uschenumnà MPN-Mapping, nua che jau curregel sbagls e cumplettesch indicaziuns davart tracks da musica che n’èn betg vegnids transferids automaticamain en il sistem. Tar mias incumbensas accessoricas tutgi da distribuir la gasetta duas giadas a di, dad ir a la posta il suentermezdi e da surpigliar il retschaviment mintgamai 15 minutas l’avantmezdi sco er il suentermezdi.
Il mardi lavur jau en la partiziun da finanzas. L’avantmezdi controllesch jau quints en Verify ed als transferesch en il portal dal SAP. Il suentermezdi controllesch jau en il portal dal SAP tge indicaziuns che mancan sin ils quints e las cumplettesch. Apaina che mia scheffa ha verifitgà quai, poss jau trametter ils quints a la persuna responsabla per la conferma. Ina giada al mais svidel jau ils daners da noss automats, port els a la banca e registresch la summa en noss portal. Ulteriuras incumbensas datti era, mo quellas èin cumplitgadas da declarar ed én da far mo mintgatant. Las incumbensas secundaras correspundan a quellas dal glindesdi.
La mesemna lavur jau en la partiziun da persunal (Human Resources). Mias incumbensas èn fitg multifaras qua. Jau m’occupesch d’entradas, extradas e midadas da persunal. Jau garantesch che tut ils documents necessaris èn avant maun ad uras. Ultra da quai controllesch jau ils EOs (urden da cumpensaziun dal gudogn) e fatsch rendaquints da paja adattads per quel intent. En l’uschenumnà dossier electronic ch’è disponibel en il portal SAP archivesch jau differents documents. Ina giada al mais fatsch jau in reporting per il radio, publitgesch giubileums, prepar las cartas d’anniversari per persunas pensiunadas e controllesch ina glista da pendenzas. En pli surpigl jau 15 minutas l’avantmezdi e 15 minutas il suentermezdi il retschaviment.
La gievgia ed il venderdi frequent jau la scola professiunala.
Ella Flepp (terz onn d'emprendissadi):
Glindesdi e mardi lavur jau en la partiziun da communicaziun e marketing. Mia incumbensa fixa da mintg’emna è il lexicon dals uffants. Mintg’emna dastg jau actualisar la pagina d’uffants sin rtr.ch cun chargiar si il “Minisguard” da la fin d’emna passada. Alura survegn jau mintg’emna autras lavurs. Per il mument sun jau vid chargiar si audios da differents temas en noss idioms sin nossa landingpage «Decodar nossa cultura». La pussaivladad da zambregiar insatge nov per la pagina d’uffants hai jau adina. Tar quai na tutgi dentant betg mo da zambregiar, jau preparer l’artitgel, scriv l’instrucziun, fatsch fotografias da mintga pass, etc. Da Pasca e durant l’advent dastg jau preparar in’acziun per ils uffants, nua ch’els pon gudagnar insatge. L’advent 2024 è stà il tema zambregiar u malegiar in Son Niclà. En la partiziun communicaziun e marketing n’a avain nus il terz onn d’emprendissadi betg bleras lavurs fixas.
La gievgia ed il venderdi lavur jau en la partiziun dal stab program ed il venderdi suentermezdi en la partiziun da la musica. En la partiziun dal stab program hai jau bunamain mo lavurs fixas. Mia emprima incumbensa la gievgia en damaun è da d’endatar en noss sistem OpenMedia l’entir program da kino che vegn via e-mail. Quai fatsch jau per ils tschintg kinos che nus avain en il Grischun. Sco proxim dastg jau far l’inserat da RTR per La Quotidiana. Quest inserat faschain nus mintga di, mo cunquai che jau sun mo la gievgia ed il venderdi en quella partiziun, fatsch jau l’inserat per la fin d’emna e per il glindesdi. L’inserat da la fin d’emna cuntegna il program da radio, da televisiun (“Profil”, “Marella”, “Vita e Cretta”, “Cuntrasts”, ...) sco er inserats per far reclama. Quai è ina moda da far reclama che RTR fa sin palpiri.
Silsuenter hai jau da trametter a las victuras ed als victurs ils bons gudagnads sco er alas giubilaras ed als giubilars la cuppina. Per omaduas acziuns da radio avain nus mintgamai ina glista e sin quella glista ves jau quants bons e quantas cuppinas che jau dastg trametter a las persunas. Dasper quellas duas acziuns avain nus anc in’ulteriura acziun, numnadamain “ll cumpliment”. Mintga venderdi survegn ina persuna in cumpliment dad in’autra persuna via radio. Jau hai l’incumbensa d’empustar il matg flurs per questa persuna e sun responsabla che questa persuna survegnia las flurs il venderdis. Il venderdi avantmezdi hai jau era l’incumbensa da preparar e trametter l’inserat per La Quotidiana. L’inserat da glindesdi cuntegna l’”Artg musical”, il program da radio e differents inserats da reclama. Il venderdi avantmezdi survegn jau per il pli anc intginas lavurs supplementaras, sche jau hai fatg tut. La gievgia ed il venderdi hai jau anc da surpigliar per Saskia la pausa da retschaviment per 15 minutas l’avantmezdi e 15 minutas il suentermezdi.
Il venderdi suentermezdi hai jau l’incumbensa da far MPN-Mapping. Tar quel process curregel jau sbagls e cumplettesch indicaziuns davart tracks da musica che n’èn betg vegnids transferids automaticamain en il sistem.
La mesemna frequent jau la scola professiunala.
Yanic Desax (terz onn d'emprendissadi):
Tar l’informatica è mintga di auter. Cunquai che nus manischain tut noss servetschs tar nus en chasa, pon las lavurs variar fitg. Per exempel èsi d’installar servers e mantegnair quels cun updates sin il stadi il pli actual. Tge ch’è er in’incumbensa che sto vegnir fatga ina giada al mais è d’actualisar tut noss laptops dal pool cun updates u era da guardar che tut l’urden che nus avain per dar or a las collavuraturas ed als collavuraturs saja sin il stadi actual.
Ina persuna da la partiziun da l’informatica ha mintgamai il servetsch da helpdesk. Quella prenda encunter telefons cun problems tecnics da nossas collavuraturas e da noss collavuraturs. Nus faschain dentant mo support intern, nagin support per persunas externas u autras fatschentas. La persuna che ha mintgamai il servetsch da helpdesk ha las lavurs che varieschan il pli fitg. Quai pon esser pitschens problems sco per exempel midar or ina tastatura fin a problems pli gronds, nua ch’in sistem da nus croda or. Mintgatant na pudain nus betg schliar ils problems qua tar nus. En tals cas stuain nus mintgamai ans drizzar al helpdesk spezialisà per quel program u servetsch che fa problems.
Tranter auter avain nus era da preparar las chaussas tecnicas per novas collavuraturas e novs collavuraturs che cumenzan tar nus. Quai vul dir che nus stuain preparar in laptop cun headset e mieur, crear in account e far in’introducziun per quella persuna.
La mesemna hai jau mintgamai scola.