Hallo ti! Jau sun Saskia Cathomas. Jau absolv mes emprendissadi tar RTR Radiotelevisiun Svizra Rumantscha.
Tge fas ti lura durant l’entir di? Co vesa ora tes mintgadi da lavur? Tge fas lura precis? Mintgin da nus è segir gia stà confruntà cun questas dumondas. Savens èsi grev da resumar l’entira lavur en ina, duas frasas. Perquai hai jau tschentà a mias collegas ed a mes collegas che fan era l'emprendissadi tar Radiotelevisiun Svizra Rumantscha RTR las suandantas trais dumondas:
- Pertge fas ti tes emprendissadi tar RTR?
- Tge è la chaussa la pli attractiva / la pli interessanta tar RTR?
- Tge has ti emprendì durant tes temp tar RTR?
Marco Nay (emprim onn d'emprendissadi):
1. Jau absolv mes emprendissadi tar RTR, perquai che RTR è ina chasa da medias rumantscha e perquai che la lingua rumantscha ma stat a cor. In ulteriur punct, pertge che jau fatsch mes emprendissadi tar RTR è ch’ ins vesa en tut las spartas e tge che capita avant ch'ins vesa en la televisiun.
2. Igl è interessant che l'emprendissadi tar RTR è fitg varià, perquai che jau mid mintg'onn la partiziun. Uschia survegn jau invista en pliras spartas.
3. Damai che jau hai gist cumenzà mes emprendissadi tar RTR, n'hai jau anc betg emprendì uschè bler. Quai che jau hai emprendì vegn jau segir a pudair duvrar en il futur u durant mes emprendissadi tar RTR.
Ella Flepp (terz onn d'emprendissadi):
1. Perquai che RTR ha in emprendissadi interessant e vast. La glieud è flotta, servetschaivla e cordiala. Il team da RTR sa cumpona da pliras partiziuns, sis da quellas pudain nus emprendistas ed emprendists visitar e far midada mintg'onn. Sche nus avain interess vi d'ina sparta sco p.ex. il radio, pudain nus accumpagnar in di il team da radio.
2. Il pli interessant è che nus dastgain midar mintg'onn la partiziun ed emprender ina massa novas chaussas dal marketing fin tar las finanzas. Nus emprendain dad ir enturn cun programs novs sco inDesign, quai ch'è in program cumplex, dentant fitg interessant.
3. Jau hai emprendì che mintgin gida in l'auter, sch'insatgi dovra agid. Da l'autra vart hai jau era emprendì dad ir enturn cun programs novs sco inDesign, Verify euv.
Tge fa RTR per...
Yanic Desax (terz onn d'emprendissadi):
1. Il di da fufragnadi ha plaschì fitg bain a mai, uschia che jau hai decidì da far in emprendissadi tar RTR.
2. Il pli interessant per RTR è che las lavurs èn adina multifaras e betg monotonas.
3. Jau hai emprendì fitg bler da mia clamada, ma era co che jau poss gidar ed ir enturn cun quels che han problems tecnics.
La lavur ed ils dis da scola durant l'emprendissadi tar RTR:
| 1. onn | 2. onn | 3. onn | |
|---|---|---|---|
| Biro | secretariat da la direcziun | finanzas | secretariat dal program |
| logistica | resursas umanas | communicaziun & marketing | |
| retschaviment | redacziun da musica | retschaviment | |
| retschaviment | |||
| Scola | 2 dis | 2 dis |
Profil M: 2 dis Profil E: 1 di |
Nevio Monn (emprim onn d'emprendissadi):
1. Jau hai gia da pitschen ensi udì RTR e gia lura gì interess da l'interpresa. Gia en la tschintgavla classa hai jau fatg il di dal futur mes emprim fufragnadi tar RTR, era sco informaticher. Quai è in siemi che jau hai gia daditg ed ussa è el ì en vigur.
2. Che jau poss m'approfundar en in tema che ma fascinescha talmain: ils computers.
3. Jau hai emprendì co ir enturn cun Linux, co configurar ports da LAN, ed jau hai era emprendì co far backups da computer ed anc bleras autras chaussas.
Ed era jau (Saskia Cathomas) sun mezza sa dumandada, pertge che jau sun atgnamain s’annunziada tar RTR:
1. Discurrer rumantsch, quai è stà in dals motivs ils pli gravants per far mes emprendissadi mercantil tar RTR. In ulteriur motiv è ch'ins è en bleras differentas partiziuns. In punct impurtant è che la glieud è flotta tar RTR ed ins sustegn in l'auter.
2. La chaussa la pli attractiva ed interessanta èn las differentas partiziuns. Ed uschè era las differentas persunas ed ils differents idioms ch'èn datiers da RTR.
3. Jau hai emprendì d'esser pli averta vers autoritads ed era vers persunas che jau n'enconusch anc betg. Jau hai era emprendì d'ir enturn cun blers programs differents sco Verify, SAP, portal SAP e Sharepoint.