Di da solidaritad - 3,4 milliuns francs rimnà per «Furmaziun per tuts»

Durant il di naziunal da solidaritad han pliras persunas prominentas e voluntaris prendi encunter las donaziuns dad audituras ed auditurs en las centralas da telefon a Turitg, Genevra, Lugano e Cuira. Las persunas prominentas a Curia èn sta commembers da la regenza grischuna, il columnist Christian Ruch ed era Markus Solinger, il secretari general da la Lia Rumantscha.

Per la polizia è il tema d'in bun avegnir per uffants e giuvenils fitg impurtant, di Barbara Hubschmid, la scheffa da la Polizia criminala dal Grischun. I saja fitg impurtant ch'ils giuvenils hajan la pussaivladad dad ir a scola e survegnan ina plazza d'in emprendissadi per daventar independent. Perquai che uschia saja er pli pauc probabel ch'ils giuvens u las giuvnas sa tschentan sin via.

Tenor Martina Müller-Kamp, commembra da la direcziun da la GKB hajan problems finanzials tar giuvenils u er tar creschids savens da far cun la mancanza da savida u scolaziun en il sectur da finanzas. Sch'ins vegnia da meglierar gia baud la furmaziun finanziala, lura vegnissan ins da meglierar la vita da bleras persunas cura ch'ellas èn creschidas u er en renta. Perquai ha la Banca Chantunala Grischuna er sezza fatg ina donaziun da 10'000 francs per questa rimnada.

Era l'entira regenza grischuna è da la partida e prenda giu ils telefons da donaziuns. Il cusseglier guvernativ Jon Domenic Parolini di che la scolaziun è insatge dal pli impurtant. Perquai sajan els er tuts da la partida tar questa rimnada. Sin la dumonda sche nus avain in sistem gist en il Grischun, di Parolini che da princip hajan tuts access a la scola, i dettia dentant adina er singuls cas nua che quai na funcziuna betg. Quai tranter auter tar persunas che vegnan da l'exteriur. Era il chantun ha fatg ina donaziun da 10'000 francs.

Per il schurnalissem saja la furmaziun essenziala, di David Truttmann, schefredactur da la FMR. Schurnalists e schurnalistas dovrian enconuschientscha da lur mintgadi e duain sa participar activamain a la cuminanza, perquai che lezs sajan la fin finala er ils adressats. Ed er sco bab da famiglia èsi impurtant ad el che ses uffants survegnan ina buna furmaziun.

Tenor Christian Ruch, l'istoricher e columnist saja la furmaziun cunzunt fitg impurtanta per la democrazia. Persunas che sajan bain furmadas na sa laschan betg uschè spert cugliunar da «fake-news». Quai saja quai che nus duvrain il mument urgentamain, aschunta el. Plinavant na vegna il mund betg pli simpel en il futur e perquai saja la furmaziun fitg impurtanta.

Co vegn decidì per tge ch'ins rimna daners?

Ernst Lüber che fa part da la direcziun da la Chadaina da Fortuna declera co ch'els decidan per tge che vegn mintgamai rimnà daners. Internaziunal vegnia per part rimnà per crisas e catastrophas nua che persunas dovran agid, là saja l'utilisaziun dals daners clera. En Svizra hajan ins dapli libertad. La Chadaina da Fortuna guarda là ensemen cun expertas ed experts per guardar nua ch'i dovra anc agid.

Daco ch'ins è sa decidì da rimnar daners per uffants e giuvenils haja cunzunt gì da far che durant corona hajan blers stuì star a chasa e cunzunt en l'exteriur hajan uschia blers stuì interrumper lur emprendissadis u scolaziuns. Là è la Chadaina da Fortuna siglida en ed è s'engaschada ch'els han puspè pudì cuntinuar.

Furmaziun per tuts – in avegnir per uffants e per giuvenils

Sin l’entir mund na pon 244 milliuns uffants betg ir a scola. Uffants che n’han nagin access a furmaziun èn savens pertutgads da povradad ed exclusiun sociala. Ma era persunas giuvnas en Svizra èn pertutgadas. Mintga dieschavel giuvenil n’ha nagina furmaziun. Giuvenils senza scolaziun han ina ristga da viver pli tard en paupradad quatter giadas pli auta. Perquai appellescha la Chadaina da Fortuna da sa solidarisar cun ils pli giuvens.