Gia en il temp d’uffanza ha Vincenzo Galati realisà che l’emigraziun era part da la mentalitad da la populaziun da ses vitg nativ San Vito en Calabria. El sa regorda dal boom d'emigraziun dals onns 60 e 70 cura che blers «Sanvitesi» eran emigrads en il nord da l’Italia u en Svizra. La stad turnavan els a San Vito cun bels vestgids e bels autos.
Il giuven Vincenzo Galati admirava quai. Insanua en ses cor è s'envidà gia lura il desideri da tschertgar novas experientschas per ses futur. Cun 17 onns ha Vincenzo Galati prendì cumià da sia mamma Vitina Galati e da ses frar pli giuven Domenico per sa render en il nord da l’Italia. Tar in aug ha el lavurà ed abità. Là ha el era giudì ses onns da giuventetgna. «Milaun ha plaschì fitg bain a mai», di Vincenzo Galati. Ina visita da trais dis tar ina cusrina a Danis en Surselva ha dentant midà l’onn 1979 las perspectivas dal giuven Calabres. Ina nova flomma ha cumenzà ad arder en ses cor: quella per la Surselva.
Jau sun stà intgantà da la cuntrada, las vatgas, insumma tut era bellezza.
En Surselva ha Vincenzo Galati emprendì da lavurar e manischar maschinas d'exchavaziun. Blers onns è el stà fidaivel a l'interpresa da construcziun Candrian da Glion. Durant la lavur, ma era cun sia dunna Ursi ha Vincenzo emprendì fitg bain rumantsch. «Tudestg è adina stà in problem», di el, ma cun rumantsch e talian saja el adina vegnì bain a frida.
A chasa discurrin nus talian, rumantsch e tudestg. Ma cun mia biadia discrur jau be talian.
Il viadi da vacanzas da Glion a San Vito ha Vincenzo Galati fatg fitg bleras giadas cun sia dunna Ursi e las figlias Tanja e Vanessa. La situaziun da sanadad da sia dunna na lubescha actualmain dentant betg lungs viadis en l'Italia. Resenta l'um da 62 onns nostalgia per sia patria nativa? «Jau vom gugent enavos per insaquantas emnas a chasa a San Vito. Quai è fitg bel, ma mia vita è uss qua ed jau na resent betg il giavisch da turnar e restar per adina».
Tempi passati
-
Bild 1 von 3Legenda: Vincenzo Galati en scola primara a San Vito. «Jau sun stà in uffant cuntent. Mes frar ed jau essan creschids si sulettamain cun nossa mamma ma a nus mancava nagut». mad -
Bild 2 von 3Legenda: Vitina Galati cun ses dus figls Vincenzo e Domenico. Qua po Vincenzo avair tschintg onns. mad
-
Bild 3 von 3Legenda: Vincenzo Galati durant il servetsch militar l'onn 1980. «Ina carriera militara fiss stada ina opziun ma jau n'era betg bun da cumandar». mad
In’ura cun biografias, destins, istorgias ed experientschas da giuven e vegl ch’han da dir u da raquintar insatge.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.