Ina instituziun - Il bus da San Vito

Ils onns 70 èn ils onns da fluriziun dal Pullman. Da quai temp vegniva il bus enfin sisum la Surselva cun ils emigrants talians che vegnivan a lavurar. Oz parta in bus pitschen da La Punt/Rehanau enfin Bellinzona e da là vai vinavant cun il bus grond, cun il Pullman. Dal reminent, il num Pullman deriva da l'inventader dals trens a lunga distanza pli luxurius e confortabels – l'American George Pullman.

Il viadi va tras l'entir stival talian – 1'400 kilometers enfin giudim la Calabria a San Vito. Il viadi cuzza 20 uras. Adina puspè sorta il bus da l'autostrada per laschar entrar novs passagiers. E mintga duas uras vegn fatg pausa. Malgrà ch'ins fiss bler pli spert da sgular en la Calabria stima la glieud da viagiar cun il Pullman.

Viagiar cun il Pullman – nuncumplitgà e cumadaivel

Organisar in viadi cun il Pullman da la firma Viaggi Tino funcziuna a moda tradiziunala, analoga. Sin ina pitschna carta è nudà l'urari da l'entir onn. Sin quel vesan ins tut ils dis ch'il bus parta en la Calabria e cura ch'el turna en Svizra.

Dasperas èn ils numers da telefon da la fatschenta e basta. Nagut cun empustar in plaz en l'internet e pajar quel ordavant cun la carta da credit sco ch'igl è usità ozendi. Il client emposta ses plaz en il bus per telefon. La saira avant la partenza infurmescha Viaggi Tino il client – era per telefon – cura ch'il bus parta exact da ses lieu da partenza. Pajà vegn bar en il bus.

In bus – bleras istorgias

Cun il bus viagian giuvens e vegls. Quasi tuts han lur ragischs en la Calabria. Quai collia ed i regia in'atmosfera famigliara en il bus. Ins vegn en discurs in cun l'auter e raquinta da la vita en Svizra e da la vita en l'Italia. Bleras famiglias van dapi generaziuns cun il Pullman.

San Vito giudim la Calabria – ina pitschna Surselva

San Vito è in vitget da 1'600 persunas damanaivel da la Mar Ionica. Ils onns 60 enfin 90 han millis umens e dunnas bandunà il dachasa ed en ids en Svizra a lavurar. Quels da San Vito èn da lezzas uras surtut vegnids en Surselva. Els enconuschan la regiun e discurran per part era rumantsch. Blers èn restads en Svizra e turnan a San Vito per far vacanzas u per visitar la famiglia. Intgins returnan suenter la pensiun en la bassa Italia. La bar amez il vitg è il lieu da sentupada per raquintar las novitads da qua e là.