Victor Rufinatscha - «Jau hai gì memia pauc temp per l’amur»

En sasez fiss Victor Rufinatscha gia daditg pensiunà. Dentant lavura el anc adina e maina sia atgna gallaria d’art e d’antiquitads a la Maistra a Zuoz. En l’ufficina lavura l’um da 74 onns ultra da quai mintga di sco enramader da maletgs. Emprendì da far quai haja el a Cuira durant ils dis che ses emprendists eran a scola.

Giacomettis e Carigiets

En sia gallaria La Laterna Talvo a Zuoz ha Victor Rufinatscha exponì da tuttas sorts maletgs d’artists enconuschents e da differentas classas da pretschs. El na possia betg inditgar la valur exacta da tut quai che sa chatta en sia gallaria, dentant sa tractia d'in import cun sis nullas. Ses favurits sajan ovras dad Augusto Giacometti, ch’el avess gugent anc emprendì d'enconuscher persunalmain. En la vegliadetgna da 16 onns na saja l’interess per l’art dentant anc betg propi stà grond, admetta Victor Rufinatscha. Ch'el haja emprendì successivamain, era durant aucziuns da maletgs, d'enconuscher il mund da l'art.

Reussì sco affarist independent

Emprendì da saller ha Victor Rufinatscha a Zuoz. Quella professiun da far sellas haja el amà fitg. La crisa d’ieli ils onns 1973/1974 aveva er influenzà ferm il martgà da lavur en Engiadina, uschia ch’il patrun da Victor Rufinatscha n’aveva betg pli avunda lavur. Per el sez saja quai stà in mument decisiv da ristgar da far il pass en l’independenza e da fundar in agen affar da decoraziuns internas.

Lavur, lavur....

Ch’el haja pudì profitar dals buns onns en il sectur da construcziun, agiunta l’um vestì cun scharpa, chamischa alva e chautschas cotschnas. Dentant n’haja el betg dà avunda attenziun durant quest temp a tut quai enturn el, pia er a l’amur. Quai deplorescha el. Oz viva el sulet a Madulain. Cun sia figlia adoptada ha Victor Rufinatscha pir puspè contact dapi intgins onns.