La famiglia d’artists Giacometti è unica. Dal bab Giovanni, a la mamma Annetta tar ils uffants Alberto, Diego, Ottilia e Bruno eran in e scadin en ina moda u l’autra creativs. Tuts èn naschids en Bregaglia e ruaussan sin il santeri da Borgonovo, in vitget al pe da taiss culms da granit.
La cuntrada ha furmà ils Giacomettis ch’eran cultivads e cosmopolits. Il barat cun autras culturas ed auters artists era ina part impurtanta da lur vita. La convivenza famigliara intensiva ha creà ina premissa extraordinaria per il svilup artistic dals uffants.
La reschissura Susanna Fanzun era gia d’uffant fascinada da las illustraziuns dal cudesch «Parevlas Engiadinaisas» da Giovanni Giacometti.
Las picturas èn s’imprimidas en sia memoria. Sco autura da film è ella sa deditgada adina puspè cun ils Giacomettis. Per exempel ha ella per il 100avel anniversari dad Alberto Giacometti realisà avant 20 onns per RTR il film «Nos Alberto». En ses nov film «La famiglia sut la lampa – ils Gicaomettis» suonda ella il vial da la entira famiglia. Tge è il misteri dal success da questa famiglia?
Suandond las ovras d’art dals Giacomettis mussa il film en il cor da la famiglia, uschè sco ch’ils Giacomettis han vis lur mintgadi. Il raquint vegn cumplettà cun citats or da brevs per part nunenconuschentas e cun intervistas cun perditgas dal temp, expertas ed experts. Il film «La famiglia sut la lampa – ils Giacomettis» sa differenziescha dad auters films cun quai che Fanzun raquinta l’istorgia cun in’egliada feminina. Ella reflectescha la rolla centrala da la consorta e mamma Annetta Giacometti-Stampa e sia influenza sin ses um ed ils uffants talentads.
