Impressiuns da la saira
-
Bild 1 von 5Legenda: Elias cun Chiara Jacomet, ANIKK, Anatina e la Late Lounge Band Da sanester Lucas Schwarz, Elias Tsoutsaios, Chiara Jacomet, Andi Schnoz, Rolf Caflisch, Olivia Virgolin, Dshamilja Maurer ed Anik Casutt. RTR, F. Deflorin -
Bild 2 von 5Legenda: Chiara Jacomet en la Late Lounge Voices. RTR, F. Deflorin
-
Bild 3 von 5Legenda: ANIKK ANIKK durant sia preschentaziun. RTR
-
Bild 4 von 5Legenda: Anatina Dshamilja Maurer ed Olivia Virgolin. RTR, F. Deflorin
-
Bild 5 von 5Legenda: Il public da la Late Lounge Voices è vegnids divertids da las impressiunantas vuschs femininas. RTR, F. Deflorin
Chiara Jacomet
Ella è ina dunna cun bleras fatschettas musicalas. Jazz u musica da pop, la cumponista e chantadura surpassa musicalmain tut ils cunfins tranter solo e Big Band. Anc avant paucs onns è la giuvna dunna stada enconuschenta plitost regiunal (Surselva) cun sia band «Chiara». Cun studegiar musica a la Scol'auta da Lucerna è sa midà fundamentalmain ses mund musical. Igl è restà pauc da la prima «Girlgroup» rumantscha da l'onn 2017, sulet la vusch pregnanta da Chiara cun ses timbre stgir.
Il mument è ella vid terminar ses studi. Quai fa ella tranter auter cun ina cumposiziun per Big Band. Pli gronda attenziun ha ella però cun sia furmaziun «ladunna» che Chiara ha fundà ensemen cun la battarista ed arranschura Momo Kawazoe. Il duo è envidà quest onn al Open Air Lumnezia, in'onur che betg tuttas bands indigenas survegnan. En la Late Lounge «Voices» chanta Chiara solo ensemen cun la band da chasa RTR.
Anatina
Quai è in duo da chantauturas grischun, Olivia Virgolin e Dshamilja Maurer. Il 2017 han ellas publitgà l'emprima EP e suenter ina pausa pli lunga è il duo Anatina dapi il 2022 puspè activ.
Duas vuschs che na pudessan avair in pli grond cuntrast, accumpignadas da duas ghitaras. En quest mund sa mova Anatina cun in'armonia persvadenta e riffs da ghitara extraordinaris e mintgatant era cun ina bassdrum. Per la Late Lounge suna Anatina ensemen cun la band da chasa RTR.
ANIKK
Anik Casutt è oriunda da Sagogn. Biars onns ha ella sunà battaria «davostiers» ed ha insacura vulì far il pass «davontiers». Ella ha cumenzà a scriver texts e cumponer vitiers las melodias adattadas. Anik ha pia fatg ina metamorfosa da la battarista a la chantautura. En la Late Lounge vegn ella accumpagnada da nossa band da chasa.