L'entschatta dal 2024 aveva l'Uffizi federal da communicaziun, BAKOM, surdà novas concessiuns per ils onns 2025 enfin 2034. En la regiun Svizra Sidorientala ha il project Radio Alpin survegnì surprendentamain la concessiun, e betg la Somedia cun ses radio Südostschweiz. Cunter questa decisiun aveva la Somedia fatg recurs il favrer 2024 al Tribunal administrativ federal.
Suenter lung vi e nà ha il Tribunal administrativ federal la finala decis che Radio Alpin n'ademplescha betg las premissas da concessiun. Uschia ha tuttina la Südostschweiz Radio SA survegnì la concessiun da radio enfin il 2034 enstagl dal duo Roger Schawinski e Stefan Bühler.
Sco directur da l'Uffizi federal da communicaziun ha il Grischun Bernard Maissen purtà la responsabladad per l'entir process areguard la surdada da las concessiuns.
Nus n'avain fatg nagins sbagls.
En discurs cun la moderatura da RSO, Katharina Balzer, e cun il moderatur da RTR, Andri Franziscus, s’exprima Bernard Maissen tranter auter davart il vi e nà dal davos onn, davart sia uffanza ad Arosa e sia vita sco directur dal Uffizi federal da communicaziun.
Bernard Maissen è creschì si ad Arosa, ha studegià germanistica, istorgia e schurnalissem a l'universitad da Friburg e lura lavurà en diversas funcziuns sco schurnalist e schefredactur. Avant ch'el ha midà tar il BAKOM è el stà schefredactur (2005–2017) e commember da la direcziun da l'Agentura da novitads svizra SDA. Dal 2013 fin il 2018 è Bernard Maissen era stà commember da la cumissiun da medias federala EMEK.
Bernard Maissen ha cumenzà sia funcziun sco directur dal BAKOM/UFCOM il prim da fanadur 2020.
10 dumondas curtas a Bernard Maissen
- Radio Grischa u Radio RTR? Radio RTR.
- Administraziun u martgà liber? Administraziun.
- Medias socialas: funtauna per infurmaziuns ubain privel? 50:50
- Intelligenza artifiziala: schanza u privel per ils meds da massa? Schanza.
- La bun'ura a las desch u la saira a las diesch? Saira a las diesch.
- Far sez u delegar? Delegar.
- Tagesschau u Echo der Zeit? 50:50
- Nua essas Vus meglier: strategia a lunga vista ubain schliaziuns a curta vista? Strategia a lunga vista.
- Taxa per la SSR: 200 u 330 francs? 300 francs.
- Albert Rösti u Simonetta Sommaruga? Albert Rösti.
«50:50» – il videocast communabel da Somedia e RTR
Somedia e Radiotelevisiun Svizra Rumantscha RTR porschan cun il format da talk «50:50» in nov product communabel. Il videocast vul promover mintga mais discurs approfundads cun represchentantas ed represchentants da l'economia, da la politica e da la societad.
Tut ils discurs
Pertge il num «50:50»?
- Equiliber e diversitad: il num dal videocast accentuescha las stentas da preschentar ina selecziun da giasts equilibrada e diversa per represchentar ina paletta vasta da chaus e persunalitads.
- Simplicitad e clerezza: In num simpel e chapibel sco «50:50» associescha directamain l'idea fundamentala dal podcast, senza stuair declerar bler dapli.
- Simbol da fairness: La relaziun da 50:50 vegn duvrada savens sco simbol per fairness ed egualitad – quai che correspunda bain er a las finamiras dal podcast.