RTR: Bernard Maissen, il Tribunal administrativ federal ha decidì che la concessiun da radio per il Grischun e Glaruna va a la Südostschweiz Radio e betg sco quai che l'Uffizi federal da communicaziun (BAKOM) aveva oriundamain decidì al radio Alpin da Roger Schawinski e Stefan Bühler. Quant fitg ha questa decisiun fatg surstar Vus?
Bernard Maissen: Nus avain spetgà ina decisiun e quella è vegnida ussa. Nus n'avevan betg in'opiniun tge decisiun che la dretgira avess da prender. Uss avain nus d'acceptar quai, metter enturn e dar la concessiun a Radio Südostschweiz.
Decisiva per il tribunal a Son Gagl è stada la relaziun tranter ils redacturs da program scolads e dals betg scolads. En la cunvegna da branscha cun ils sindicats da medias èsi definì che la relaziun tranter persunas scoladas e betg scoladas na dastga betg esser pli pitschna che 3:1. Per la dretgira è quai in punct fundamental che sto esser ademplì per survegnir ina concessiun. La dumonda da Radio Alpin n’ademplescha dentant betg quai. Pertge n’avais pervi da quest manco betg direct sclaus la dumonda da Schawinski e Bühler da la procedura da concessiun?
Nus avain e guardà sin las cifras e vesì che Roger Schawinski n’ademplescha betg quest dumber, perquai avain dà ad el 0 puncts en quest aspect. Quai era dentant in da plirs aspects. Perquai avain dumbrà ensemen cun 0. Tuttina è Schawinski vegnì sin ina pli auta cifra, uschia che nus avain dà ad el la concessiun. La dretgira ha uss ditg che quai saja ina cundiziun, ina suletta or da tut las cundiziuns, che valia gia l'entschatta e ch'ins na dastgia suenter betg pli guardar vinavant sin ils auters puncts ed ha uschia decidì da dar la concessiun a Radio Südostschweiz. Quai è in'autra interpretaziun da la furmla davart las cundiziuns da lavur.
En la lescha da radio e televisiun stat dentant scrit en connex cun las premissas generalas da concessiun ch’il candidat stoppia garantir ch’el resguardia las cundiziuns da lavur da la branscha. Quai vesa era il Tribunal administrativ federal uschia. N’ha l'Uffizi federal da communicaziun uschia betg simplamain violà la lescha da radio e televisiun?
Bernard Maissen: Na, gliez n’avain nus natiralmain betg. I dat anc bleras autras formulaziuns sut questas cundiziuns da lavur che nus avain respectà. Nus avain dà 0 puncts a la candidatura da Roger Schawinski ed avain pensà ch’uschia saja quai ademplì. Il Tribunal federal administrativ vesa quai auter. Ins sto dir ch’en il discurs cun la dretgira ha Schawinski sincerà ch’el vegnia ad augmentar questa cifra cura ch’el cumenza. Quants collavuraturs – giuvens u vegls – quai n’è gea betg insatge static, quai è insatge che mida regularmain.
Vus essas da l’avis da na betg avair fatg sbagls?
Bernard Maissen: Nus n’avain betg fatg sbagls en quest senn, nus avain interpretà la lescha in zic auter. Natiralmain ch’igl è uschia ch’il davos interpretescha la dretgira la lescha.
Tge consequenza ha questa sentenzia dal Tribunal administrativ federal per tschellas dumondas da concessiun? Ston ins uss anc ina giada prender sut la marella tut las concessiuns ch’èn vegnidas dadas?
Bernard Maissen: Na, tschellas concessiuns ch’èn vegnidas dadas n’èn betg stadas avant dretgira ed èn valaivlas.
Suenter questa decisiun pudessi dar la rinfatscha ch’il BAKOM n’haja betg fatg endretg sia lavur. È quai propi uschia?
Bernard Maissen: Nus avain fatg nossa lavur fitg precis. Nus avain investì bler temp. Quest qua è uschè in punct ch’ins ha interpretà auter. Ins na po betg dir che nus n’avain betg fatg nossa lavur. Nus avain fatg nossa lavur tenor meglier savair.
Bernard Maissen, Vus essas il directur dal Bakom. Tge consequenzas tirais Vus ord la decisiun dal Tribunal administrativ federal?
Bernard Maissen: Uss avain nus dà las concessiuns per las televisiuns ed ils radios privats enfin il 2034. Cura ch’i dat las proximas concessiuns – quellas vegnan a vegnir scrittas ora enturn il 2032 – vegn ins ad interpretar questa formulaziun auter e forsa midar las dumondas per ina concessiun. Autras consequenzas directas na dat quai betg.
Tge consequenzas vesais Vus per Vus sco directur dal BAKOM?
Bernard Maissen: Quai è ina decisiun d’ina dretgira che nus mettain enturn e quai na dat betg bleras autras consequenzas.
