En la seria da cursas dal Swiss Bike Cup sa chatta Sascha Deplazes actualmain sin il segund plaz dal classament general en sia categoria da «fun seniors». En la seria da cursas da la Bike Revolution, ina seria ch’è tranter auter vegnida lantschada avant in onn da Nino Schurter, è Sascha Deplazes actualmain a la testa suenter 4 da 5 cursas.
A la partenza al Swiss Epic 2023
Far furora vul il sportist passiunà er al Swiss Epic, la pli dira e pretensiusa cursa da mountainbike en Svizra, che cumenza mez avust. Durant questa cursa da tschintg etappas cun total 339 kilometers e bunamain 11’000 meters differenza d’autezza che maina da Lai sur San Murezzan fin a Tavau vul Sascha Deplazes ensemen cun ses collega Marcel Fürer cumbatter per la victoria.
Per sa revegnir dals strapatschs durant il Swiss Epic vegn jau a metter suenter mintga etappa mias chommas en l’aua fraida.
Il Swiss Epic n’è betg ina cursa per mintgin. Per dumagnar questa cursa extrema stoppian tant las chommas sco er il chau constar. Lura saja er impurtant da parter en bain la cursa e sa nutrir bain durant quels dis, di Sascha Deplazes. Cunzunt vegn tancà energia durant las etappas cun magliar gels.
Ils emprims dus dis gustan ils gels anc detg bain, a la fin na pon ins betg pli mirar sin gels. Lura daguttan quels quasi da las ureglias ora.
Sascha Deplazes fa bler per il success. El trenescha er suenter in plan da trenament. L’enviern passenta el bleras uras sin ils skis da passlung u sin la rolla a chasa. Per el è il sport, principal il sport da mountainbike, bler dapli che mo in hobi. Ed uschia vegn quasi er adina mo fatg vacanzas da velo, senza quel na vai betg.
Camiunist cun corp ed olma
Paucs onns suenter ses emprendissadi sco electricist da rait ha Sascha Deplazes midà sco camiunist tar in'interpresa da construcziun. Dapi 24 onns va el uss gia cun camiun, ina professiun che fascineschia el sco tar ses emprim di da lavur. Sco camiunist è el principalmain da viadi en Surselva. Viadis sur cunfins na fissan però nagut per el, uschia Sascha Deplazes.
Jau n’hai mai lungurus dad ir cun camiun, i marscha adina insatge.
Durant l’enviern lavura Sascha Deplazes en ina fatschenta da sport. Tant quest job sco er la lavur sco camiunist sajan ina buna cumpensaziun cun quai ch'el fetschia il pli gugent, igl ir cun mountainbike.
