Promover musica contemporana en colliaziun cun la lingua rumantscha: quai è l'intesiun principala da la biennala «tuns contemporans» che la Kammerphilarmonie Garubünden ed il Ensemble Ö! realiseschan quest onn per la quarta giada.
Per questa quarta ediziun ha Alfred Zimmerlin scrit in'ovra audiovisuala tenor in libretto da l'autur Andreas Neeser. Tschertas parts (discurridas e chantadas) èn vegnidas midadas en rumantsch – entras quai sa tracti qua d'in toc triling, tudestg svizzer, tudestg da scrittira e rumantsch. Il rumantsch ed il tudestg svizzer vegnan duvrads cura ch'i sa tracta d'in discurs direct, il tudestg da scrittira per las parts raquintadas.
Il fil cotschen da l'ovra
Il toc raquinta da Fravi, in bab ed um ch'è en tschertga da si'atgna persunalitad e prenda causa quai plaun a plaun cumià da sia dunna Seraina e ses figl Luca. Per els dus è quest svanir da bab ed um tut auter che simpel.
Fravi s'exprima cun pleds, Seraina cun saut e Luca cun chant.
La Kammerphilharmonie Graubünden e l'Ensemble Ö! represchentan quests trais caracters en furma da musica instrumentala. L'emprim pass dal cumponist Alfred Zimmerlin è stà da crear musica che represchenta ils trais protagonists. Cun questas trais persunas sco basa è sa furmada a la fin in'ovra cumpletta che cuntegna pled, chant, saut e musica.
Per pudair transmidar ina persuna en musica, ma stoss jau pudair metter en sia situaziun.
