100 onns György Ligeti - Uffants e giuvenils han creà in toc contemporan inspirà da Ligeti

Avert il festival da musica «tuns contemporans», en il teater da Cuira, ha l'installaziun da tun e glisch dad 80 uffants e giuvenils. Ellas ed els han creà in nov toc, inspirà da la cumposiziun «Atmosphères» dal cumponist ungarais György Ligeti.

Ils uffants e giuvenils che sunan uschiglio plitost musica classica, melodias cun structuras e ritmus exacts – han gì grond gust da prender part al project. Qua han ellas ed els dastgà crear cun, empruvar ora, esser creativs e vegnir cun atgnas ideas.

Prozess da lavur: Co crear atmosferas musicalmain

Il festival da musica nova

Davent dals 30 da mars enfin ils 2 d'avrigl 2023 datti tschintg concerts en il Teater da Cuira ed in en la tur dal Güglia. Tut ils concerts èn inspirads dal cumponist ungarais György Ligeti, che vala sco in dals pli impurtants dal 20avel tschientaner da la musica nova, declera il cussegliader artistic da l’«Ensemble ö!», David Sontòn Caflisch.

In program vast

Uschia sunan tranter auter la Filarmonia da chombra dal Grischun, l’Ensemble ö! e l’Ensemble Vocal Origen cun il dirigent Clau Scherrer. Nov saja quest onn era, ch'i dettia ina maschaida tranter la versiun analoga dal 2019 e digitala dal 2021. I dettia pia er in livestream da tuts tschintg concerts.

Il livestream dal 2021 hajan numnadamain persunas da l’entir mund guardà: interessads or dals Stadis Unids, la Norvegia, la Spagna, la China u era aspectaturas da la Russia e la Croazia.

In access a la musica contemporana

Musica contemporana vegn savens taxada sco cumplitgada e greva da chapir e gist perquai veglian las iniziantas ed ils iniziants dal festival era cuntanscher persunas che n'han anc betg gì tant contact cun quest stil.

L'entschatta fa il project dal Musiksalon da Cuira, nua che amaturs e scolaras e scolars da musica sunan ed interpreteschan da nov – ensemen cun profis – il toc «Atmosphères» e vegnan uschia en contact cun la musica contemporana.