2024
La citad da Cuira tira bilantscha positica da la 27avla Schlagerparada ch'ha gì lieu la sonda. Radund 30'000 aspectaturas ed aspectaturs han guardà il til cun 21 vehichels da hossa e 90 autos pitschens. Il til ha manà dal Alexanderplatz fin la Stadthalle, nua che la glieud po anc far festa fin la damaun, scriva la citad en ina communicaziun. E tenor la citad haja lur concept da segirtad sa cumprovà, uschia ch'ins haja pudì manar tras il til senza incaps.
2023
Ina parada cun bellezza aura e blers visitaders. Radund 33'000 persunas han festivà cun ils 17 hossamobils ed 85 vehichels pitschens.
2022
Suenter dus onns pausa èsi puspè stà temp per far «Hossa!» L'aura è stada plitost trida e bletscha, tuttina èn radund 28'000 persunas sa radunadas.
2020/2021
Pervi da la pandemia sto la parada vegnir stritgada duas giadas.
2018
50 onns moviment da hippis. Motiv avunda per la parada da midar program e far dus dis festa, betg mo in. Era nov è stada la ruta. Betg pli tras la citad veglia, mabain da la Grabenstrasse ora enfin la halla da la citad. Ina midada che n'ha betg plaschì a tuts e tuttas.
2017
La parada ha in nov schef. Esra Buchli da la band «77 Bombay Street» ha surpiglià il timun. Ina nova responsabladad, sco el di envers il Telesguard.
2016
Era il 2016 ha RTR rapportà da la parada. Quella giada schizunt cun filmar en 360°. Ils films pudais guardar en l'artitgel qua sut.
2015
Per Gion-Marc Siegenthaler è la Schlagerparade in termin fix. Il mecanist da Trimmis va dapi passa 10 onns al Hossa! event da Cuira, era sch’il schlagher n’è betg sia musica preferida. La 19avla Schlagerparade è però per el e ses collegas da lavur ina premiera. Els han cumprà in camiun da militar antic e transfurmà quel en in hossamobil. Nus avain accumpagnà Gioni e ses «Gugastreckers» al til tras la citad da Cuira.
2008
Massa aspectaturs ed aspectaturas, dentant n'hai quest onn betg dà la lubientscha per ina notg libra. In motiv per ils ustiers da la citad veglia da smanatschar da betg cuntinuar cun la parada sch'i na dat betg la lubientscha l'onn che vegn.
2000
1997
Tut ha entschet cun in'idea, dus «Hossamobils» e radund 4'000 participants e participantas. Andy Stöckli, Tom Leibundgut e Tschämp Patigler n'avessan betg pensà da quai temp ch'i sa sviluppescha ad ina da las grondas occurrenzas da Cuira.
Guardà sin tut ils onns para da sa cumprovar l'impressiun che blers han: L'aura è buna durant la Schlagerparade!
Dentant hai er dà singuls onns nua che l'eveniment da schlagher è vegnì accumpagnà da la plievgia. Relativamain blera plievgia hai dà durant la terza ediziun u era il 2010. Ma uschiglio ha per gronda part dominà il sulegl.
Per l'ediziun dal 2024 na vesi deplorablamain betg ora uschè sulegliv sco avant in onn.
