Armon Cantieni è naschì ils 10 da settember 1907 a Winterthur sco segund figl da Robert ed Elisa Cantieni. En la famiglia steva la musica en il center. La vopna da la famiglia Cantieni (oriunda da Pignia, Val Schons) porta era ina violina. In rom da la famiglia Cantieni è ida l'entschatta dal 19avel tschientaner en l'Engiadina Bassa nua ch'il bab Robert Cantieni è naschì il 1873 a Ftan. Cura che Armon era uffant ha ses bab lavurà sco dirigent, cumponist e magister privat per clavazin e chant da solo. Las entradas na tanschevan betg per pudair mantegnair sia famiglia uschia ch'el ha lavurà a Samedan sco administratur da l'ospital, pli tard sco ortulan. Il 1922 è Robert vegnì magister a la scola chantunala e la famiglia è sa chasada a Cuira.
Sin il centenari da Armon Cantieni
Il conturn famigliar e da vitg en l'Engiadina dentant er il grev temp da l'emprima guerra mundiala (1914-18) han laschà enavos en Armon in'impressiun durabla. El ha giudì da termagliar ensemen cun ils buobs, da far da zuppar en las streglias da Scuol e da scuvierer libramain il conturn dal vitg. Avant che pudair far quai ha el dentant exercità clavazin per pudair cuntentar las spetgas da ses bab sever.
Il 1922 è Armon entrà ensemen cun ses frar Orlando en il seminari da magisters a Cuira. Suenter avair terminà il seminari ha el studegià dal 1926-27 musica a Paris (clavazin tar Alfred Cortot e cumposiziun tar Nadia Boulanger) e dal 1927 – 1932 al conservatori da Turitg (orgla tar Ernst Isler, clavazin tar Walter Lang, contrapunct tar Paul Müller e direger tar Hermann Dubs). Il 1934/35 ha el anc fatg ina scolaziun al conservatori da Basilea (direger tar Felix Weingartner e chant solo tar Arthur Althaus). Tranter ils onn 1929 e 1937 è Armon Cantieni adina puspè sa mussà sco musicist ordvart talentà en il spazi da Cuira, en la Val dal Rain da Son Gagl, en l'Engiadina ed a chaschun da diversas festas da chant. Davent il 1928 fin sia mort ha el dirigì il chor maschadà Landquart. Là ha el er inscuntrà sia dunna futura, Anni Klaas (1914 – 2004). Els dus èn maridads ils 20 da mars 1937. Da la lètg neschan il figl Andrea e la figlia Annatina.
Sper la ventira privata ha Armon Cantieni er gì success en la vita professiunala. Davent il 1937 è el stà magister da musica a la Scola chantunala grischuna sco era al seminari da magisters a Cuira fin sia mort prematura il 1962. Dasper ha el er dirigì divers chors, sunà l'orglà e dà concerts sco pianist.
Armon Cantieni ha scrit numerusas chanzuns rumantschas e tudestgas per l'instrucziun en scola sco era per chors maschadads e virils. Ina da sias pli grondas ovras per chor è il «Psalm 146» per chor viril ed orchester, la motetta «Jubilate Deo» sco era ovras per orgla e clavazin (suita «A la riva da l'En», «Introduktion», «Choral und Fuge»).
La mort è vegnida nunspetgada e durant ina perioda da ferma lavur creativa. Ses plaschair da viver era grond ed el gì grond gust d'emprender dad ir cun auto perquai che lez ha schlargià ses radius d'acziun. D'in'ura d'emprender dad ir cun auto è Armon turnà cun disturbis dal cor, Curt suenter, ils 8 da settember 1962, be dus dis avant ses 55avel anniversari mora Armon Cantieni pervi d'ina crisa dal cor.
Armon Cantieni en emissiuns da RTR:
Artg musical:
Noss chors: