Cumenzà hai cun la dumonda da Robert Grossmann da la Chasa Jaura ch'ha dumandà Cinzia Regensburger, schebain ella veglia far ina sairada da musical ensemen cun Flurina Danuser. Sco quai che Cinzia Regensburger di envers RTR saja questa situaziun lura «escalada» pli e pli fitg. E quai manegia ella en in bun senn: Il project è creschì, uschia ch'igl ha dà la finala il musical «Cabaret sin turnea». In toc che gioga en ils onns 1920/30 cun trais dunnas en il center.
-
Bild 1 von 5Legenda: Lucia Parolini en la rolla da Madame Juliette Madame Juliett è ina dunna cun daners sco crappa e che sa deporta era lasuenter. Mintgatant sa dumonda ella, sch'i na dettia betg anc insatge auter en la vita – ma l'amur n'èsi betg propi, ils umens van plitost sin la gnerva ad ella. RTR -
Bild 2 von 5Legenda: Christian, il possessur dal club da Cabaret Il possessur dominescha davos la bar. El dat tras la tariffa e marca gugent il macho. Ma ses chau dir na lascha betg tiers midadas, uschia ch'el è fitg surprais cura che las pussanzas dal club sa midan. RTR
-
Bild 3 von 5Legenda: Las ballarinas dal club RTR
-
Bild 4 von 5Legenda: 20 giuvenils e giuvenilas Questa giada han fatg part pli paucas persunas che l'ultima giada: L'onn 2022 eran da la partida passa 40 persunas, quella giada 20 persunas. RTR
-
Bild 5 von 5Legenda: A la prova generala èn vegnids envidads amis, amias e famiglia RTR
Per chattar la glieud na saja quai betg stà ina gronda sfida, declera la musicista da professiun ed organisatura da 24 onns. Ella haja simplamain scrit en il chat da l'onn 2021, nua ch'ella aveva gia chattà musicistas e musicists per l'emprima ediziun dal musical a Scuol.
Gaschas e viver da la musica
Era in novum da questa terza ediziun dal musical a Scuol è, ch'i dat ina gascha per ils e las involvadas. Quai grazia a daners da sponsurs ch'èn quest onn pli auts che onns vargads. Per blers musicists, musicistas, sautuns e sautunsas e autras persunas involvadas è quai in bel zutgerin, pertge far uschè in musical munta d'investir bler temp liber. Uschia è quai era sa chapì per Cinzia Regensburger, ch'ella emprova d'organisar gaschas. Cunzunt era per ella sezza che viva da gaschas sco musicista professiunala. Cun be 24 onns saja quai in siemi per ella.
Pudair viver da la musica è in fitg grond siemi ch’è daventà realitad.
Trais dunnas en il center
Il toc sa tracta da trais dunnas, tuttas cun ils medems giavischs: amur, raps e libertad. Ma tuttas trais derivan da differentas classas. En in local dal cabaret s'inscuntran ellas e daventan amias.
Maria Rauch , giugada e chantada da l'inizianta Cinzia Regensburger, è ina dunna per tut, ella nettegia en il Cabaret ma po magari era chantar. Paola Benedetto , giugada da Nina Mayer u da Flurina Danuser, deriva da Roma. Ella è sin la fugia da la polizia pervi dal possess illegal d'in Cabaret. E Madame Juliette , ina dunna ch'ha daners sco crappa e sa dumonda, tge anc insumma far cun tants raps.
Grond plaschair d'ella ha il possessur dal Cabaret, Christian . Cuntrari Madame Juliette, a lezza van ils umens plitost sin la gnerva. L'entira show vegn raquintada da la ballarina Aruna , giugada da Moana Rossi ed accumpagnada da trais ballerinas. La choreografia ha fatg Moana Rossi.