I Like How We Are – Jau hai gugent co nus essan, chanta Andrea Corona ensemen cun sia band Nesta and the Blondes. Quella gruppa da Flem sa cumpona sper Andrea anc da Lorenzo vid il bass, Michelle che chanta e suna il synthie e Joshua vid la battaria. Il 2018 han els fundà la band – lura anc en in’autra constellaziun. Cun «I Like How We Are» preschentan els ina chanzun averta e libra – quai cun la melodia, cun il text ed era cun il video che tutga tiers. Igl è ina chanzun davart amicizia, libertad e l’esser ses agen meglier ami.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch.
Igl è ina fassetta da lur segunda platta ch’è cumparida da curt. E per il mument pon els sa preschentar durant il zercladur en ils radios da RTR, SRF3, Couleur 3 e Rete Tre.
