Dapi 2018 datti la gruppa Nesta And The Blondes da Flem. Dapi lura ha la gruppa fatg pliras midadas e consista uss d’Andrea (chant e ghitarra), Lorenzo (bass), Michelle (chant e synthie) e Joshua (battaria). Lur album da debut «Come Inside» è cumparì 2020. Quatter onns pli tard e cun l’experientscha da plirs concerts pli gronds – tranter auter er a l’Open Air Lumnezia ubain il Big Air a Cuira – cumpara uss lur segund album «From NATB With Love».
L’art da tegnair l’equiliber
«From NATB With Love» ha da far nagut cun il hit da la chantadura tudestga Sarah Connor e ses grond hit e n’era betg insatge cun il film da James Bond. Quella platta cuntegnia lur corp ed olma, blera charezza e reflecteschia els sco persunas e band fitg bain – quai han ils quatter musicists da Flem tradì durant l’intervista. Sco skaters e musicists ha quai bler da far cun tegnair l’equiliber.
Nesta And The Blondes – I Like How We Are
La platta cumpara per part rauc e dir è quai n’è betg be pervia la vusch caracteristica dal chantadur Andrea Corona. Els fan indie-rock cun in zichel grunge. Ina ghitarra electrica, in bass marcant, sustegnì da la battaria energetica. Per il cuntrapais procura Michelle Früh cun melodias finas dal synthesizer e sia vusch miaivla che fa tranteren vegnir endament Kathie White dals Ting Tings. Questa maschaida dat en egl entaifer las chanzuns nua che solos da ghitarra succedan sin parts ruassaivlas cun il synthesizer che tuna tranteren sco in’orgla. Dentant er en vista sur l’entir album datti barat tranter dir e fin. Cun chanzuns sco «Love Too Fast» ubain «Alive» mussan els varts pli crivas. «I Like How We Are» percunter è pli avert e liber e «Just A Child» è allegher – dentant era cun in zic melanconia sco sch’els laschassan encrescher per quel temp da l’uffanza.
Melanconia e nostalgia èn mias emoziuns preferidas. Ina leva tristezza bitschada dal plaschair ch’ins resenta quella – uschia descriv jau gugent melanconia.
Forsa è quai era l’expressiun da lur luccadad e coolness. In auter aspect nua che la band emprova da tegnair la ballantscha: Cura èsi nonchalance e cura datti vi en il dischinteress. Per la pli gronda part vegnan els da trair tras lur lingia e l’equiliber sin l’album constat. Uschia è «From NATB With Love» sc’in lung «boardslide» – adina en la ballantscha e curt avant perder la stabilitad ch’els vegnan dentant da trair tras cun blera passiun e plaschair da quai ch’els fan.
Dapli da nova musica rumantscha e musica da l’entir Grischun chattais qua:
