Per ses project da solo ha tschernì Valentin Kopp senza far lungas il num d’artist Valentino Vivace. Pervia da sias ragischs en il Tessin è il num talian stà datiers ad el. Vivace, plain vita per rumantsch, haja el tschernì perquai ch’el haja duvrà in num cun «V» e quel haja descrit sia persunalitad il meglier. Valentino Vivace na saja dentant betg ina figura artistica – per almain 90% saja el propi uschia, schizunt la frisura da VoKuHiLa ed il stil da resti extrovertì s’audi tar ses mintgadi. L’amatur da musica che ha fatg in studi da musica a Losanna ed a Turitg è da chattar en diversas furmaziuns. Tranter auter tar «Bumblebees», «Mält» e «Chemical Fame». Uss ha el cumenzà cun ses project da solo e dastga durant l’avrigl preschentar si’emprima single «Come Mai» en ils radios da SRF 3, Couleur 3, Rete Tre ed RTR.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch .