La Cory Band ha festivà il 2024 ses 140avel onn d'existenza. Motiv avunda per registrar in nov portatun cun ina retscha novas registraziuns d'ovras classicas per Brass Band ch'èn d'impurtanza per la band. Per exempel «Fantasy for Brass Band» da Malcolm Arnold. Cun quest toc ha la Cory Band numnadamain gudagnà il 1974 per l'emprima giada il National Brass Band Championships, era sco emprima Band da Wales. Ulteriuras ovras ch'il dirigent Philip Harper ha elegì èn «Ballet for Band» (Joseph Horovitz), «Contest Music» (Wilfred Heaton) u «Dances and Arias» (Edward Gregson).
Tredegar Town Band: Holst at 150
La Tredegar Town Band e ses dirigent Ian Porthouse han prendì sco motto per lur nov album il 150avel anniversari dal cumponist Gustav Holst. L'album n'è pero betg mo in omagi al cumponist mabain er in omagi a las capacitads da sia figlia Imogen. Sper ils classichers da Gustav Holst sco «First Suite in Eb» e la «Second Suite in F» (omadus en in arranschament nov da Philip Littlemore) datti perquai ovras main enconuschentas d'Imogen Holst, uschia «The Unfortunate Traveller» e «The Glory of the West».
Whitburn Band: Astralis
Il titel da l'album da la furmaziun scotta Whitburn Band è er il titel da l'ovra principala dal nov portatun. Il cumponist Philip Wilby ha scrit l'ovra per la band sco toc da patg per il campiunadi europeic da Brass Band il 2023. Ils maletgs or da la profunditad da l'univers dal telescop spazial James Webb han inspirà Wilby per quest'ovra. L'album preschenta dentant era divers grondius solists da la Band.
Brighouse & Rastrick Band: The Music of Dorothy Gates
In focus sin las ovras d'ina dunna ha mess la Brighouse & Rastrick Band e ses dirigent Jonathan Corry. Dorothy Gates giauda grond respect sco cumponista da l'Armada dal salit ed ils ultims onns èn sias ovras vegnidas pli e pli enconuschentas er en ils cerchels profans. Mintga toc porscha a l'auditori insatge nov, davent da l'ovra dramatica «War Cry» sur in toc en Latin-Style («David's Dance») fin al toc ruassaivel «Be Still». L'album mussa persvadentamain las abilitads cumpositoricas da Dorothy Gates.
Black Dyke Band: Bliss
Arthur Bliss è stà ins dals megliers cumponists englais dal 20avel tschientaner. En il mund d'orchester èn sias ovras deplorablamain idas in zic en emblidanza e vegnidas or da la moda. Il nov disc cumpact da la Black Dyke Band – questa giada sut la direcziun da John Wilson – preschenta ina grondiusa retscha d'ovras da Bliss arranschadas per Brass Band. D'ina vart ovras enconuschentas sco «Kenilworth» u «Belmont Variations» e da l'autra vart er ovras main enconuschentas sco «Suite from Adam Zero» u «Music from The Royal Palace».