Arsène Duc è naschì il 1965 a Chermignon (VS) e cun 11 onns è el entrà en la musica dal vitg, l'Ancienne Cécilia de Chermignan sco eufonist. El è restà fidaivel a ses vitg patern. Cun 23 onns, il 1988, ha el surpiglià la bitgetta da l'Ancienne Cécilia e diregia la furmaziun dapi lura cun grond e fitg grond success. Cun la musica che suna en la categoria excellenta ha el gia gudagnà plirs titels (1. plazza a la festa federala a Montreux 2016, 1. plazza festa federala a Son Gagl 2011) e gudagnà las ultimas trais festas chantunalas dal Vallais (Crans-Montana 2024, Naters 2019, Martigny 2014).
Cun questa uniun sun jau vegnì grond ed en ella sa chatta era istorgia da famiglia. Mes tat e mes bab han sunà, ed uss er mia figlia e mes figl.
Dapi il 2008 è il num Arsène Duc era collià stretgamain cun la Valaisia Brass Band. Questa formaziun medemamain da la categoria excellenta ha el fundà e dirigia dapi lura. Gia il 2009 ha la nova Brass Band gudagnà il titel da campiun svizzer, e dal 2015 – 2021 schizunt sis giadas en roda. Sin champ internaziunal ha la Valaisia fatg furora il 2017 cura ch'ella ha gudagnà il British Open Brass Band Championship. In onn pli tard èn ils Vallesans vegnids campiuns europeics.
Il 2023 è Arsène Duc vegnì onurà cun il premi Stephan Jaeggi, la pli auta distincziun en la scena da musica instrumentala en Svizra. El è in tip fitg mudest e probabel festivescha el ses anniversari radund da 60 onns er plitost quiet.
