Il dirigent ed expert da musica da Cuira Arnold Spescha vegn undrà cun il pli aut premi en la scena da la musica instrumentala. El survegn il premi «Stephan Jaeggi» per ses engaschi extraordinari. Quai è vegnì enconuschent a la radunanza da delegads da l'Uniun svizra da la musica instrumentala a Zug.
Cun quest premi sa metta Arnold Spescha en retscha cun gronds cumponists e promoturs da la scena da musica instrumentala sco Christoph Walter, Pascal Eicher u era Blaise Héritier, per numnar be in per nums da persunalitads dal temp dad oz.
Ensemen cun Arnold Spescha vegn era undrà il Tessinais Carlo Balmelli. La surdada dal premi è ils 28 d'avust a Cuira.
Premi da renum
Stephan Jaeggi (1903 – 1957) è stà in dals gronds cumponists da la musica instrumentala. En sia memoria datti mintg'onn la distincziun «premi Stephan Jaeggi» che vegn surdada a persunas ch'èn sa fatgas meritaivlas per la musica instrumentala svizra. Stephan Jaeggi ha cumponì bleras ovras da musica instrumentala. Sia pli populara ed enconuschenta cumposiziun è il «marsch da General Guison».
Stephan Jaeggi è bain mort relativamain baud en la vegliadetgna da 54 onns. Sia ovra musicala n’è dentant betg main pulpida. Sper esser cumponist è el era stà in dirigent fitg engaschà.