En il Grischun datti per regla mintga tschintg onns ina festa chantunala da musica. Suenter Arosa il 2019 s'inscuntran questa fin d'emna 60 societads da musica (46 dal Grischun) per ina festa paschaivla a Claustra. Dapi trais onns üè il comité d'organisaziun vidlonder da preparar «Klosters 2024». Ed els han mess en pe ina bella festa.
Per las concurrenzas (zona da silenzi) hai dà a Claustra dus locals: Arena-Klosters e la nova halla da gimnastica. La concurrenza da marschar è stada sin la Landstrasse, en vischinanza da la staziun sco er da la tenda da festa e da las duas zonas da silenzi. L'Artg musical da questa dumengia porta durant duas uras las producziuns da la sonda, pli exact: las producziuns dals victurs da las singulas categorias. En l'emprim'ura ils victurs da la categoria armonia ed en la segunda ura ils victurs da la categoria Brass Band e Fanfare mixte.
Armonia
En la categoria armonia è be ina musica da la classa excellenta stada preschenta a Claustra: Il Symphonisches Blasorchester Kreuzlingen cun ses dirigent Stefan Roth. El diriga er dapi 12 onns l'Uniun da musica Sagogn ch'è sa participada en la secunda classa Brass Band.
En l'emprima classa armonia era dal Grischun be la Stadtmusik Chur da la partida. La furmaziun è sa decidida per il toc da patg «Portrait of a city» da Philip Sparke. Sco toc da pensum hai dà en questa categoria il toc «The Essence of Youth» da Stijn Roels. En la segunda classa armonia hai dà in duel tranter duas musicas grischunas: Scuol e Brusio. Gudagnà ha però ina musica da la Bassa, il Musikverein Herisau cun 187 puncts (94 / 93). Brusio ha fatg 173.33 puncts (85.33 / 88) e Scuol ha survegnì da la giuria 159 puncts (79 / 80).
Legraivlamain hai dà in victur grischun en la terza classa. Cun 192 puncts ha la Filarmonia Comunale Poschiavo fatg exact tuttina blers puncts sco la Musikgesellschaft Wengi. Lezza ha survegnì per lur toc da patg 90 puncts e per quel da pensum 92 entant che Poschiavo ha survegnì duas giadas 91 puncts.
Brass Band
En l'emprima classa Brass Band hai legraivlamain dà duas furmaziuns grischunas (GR Brass e BB Cazis) ch'èn sa concurrenzadas cun duas da la Bassa (AEW Concert Brass Fricktal e BB Schötz). Ils pli blers puncts hai dà per la GR Brass. Els han fatg en total 189 puncts (94 en il toc da patg e 95 en il toc da pensum). Sin plazza dus è Fricktal cun 188 puncts (96 / 92) e sin plazza trais Cazis cun 187 puncts (91 / 96).
Las producziuns da la dumengia vegnan emessas en l'Instrumentala da mesemna, ils 12 da zercladur 2024 ed in ulteriura emissiun Artg musical cun suns e tuns da Claustra datti lura dumengia, ils 23 da zercladur 2024.
Tuttas producziuns pudais vus tadlar sin rtr.ch/playfestas. Ils videos da la musica da marschar chattais sin PlayRTR.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
