Jau hai chattà la platta da vinil «Goats Head Soup» sin in mantun da plattas, il di, cura che mes aug ha rumì la chasa da mes tat e mia tatta. Quai in temp suenter che mia tatta che manava l'ustaria da Pitasch, è morta en l'onn 1995. Jau aveva lura dudesch onns e quest disc è mes emprim disc da vinil. Nus avevan da quest temps plitost cassettas cumpactas.
Sper il grond format da la platta da vinil ch'ins po vairamain numnar in album, è la musica in toc memoria persunala. La chanzun «Doo doo doo doo doo (Heartbreaker)» è girada massa giadas sin mes giraplattas: Ina veritabla chanzun da rock cun elements da funk, cun in bass che chatscha enavant cun schlantsch e la ghitarra cun l'effect da «whawha» che respunda sin il clavinet, in instrument da tastas electro-mecanic, tipic per il rock ed il funk dals onns '70. E natiralmain èn ils instruments da flad ed il chant là, plain energia.
Plinavant sa chatta in dals pli gronds hits dals Rolling Stones sin quest album: la ballada cun il num «Angie» che las bleras ed ils blers enconuschan. La chanzun «Winter» cun las bellezza registraziuns da ghitarras fa pel giaglina cun sia atmosfera melanconica. Ed er da numnar, èn ils tocs «Dancing With Mr D» ed «Hide Your Love» che marcheschan il stil da la band ch'è enormamain influenzada dal blues. Igl è il davos album ch'il producent Jimy Miller producescha per la band, ina persuna ch'ha laschà enavos ses fastiz sin ils discs dals Rolling Stones tranter 1967 e 1973.
