Program per dumengia
L’ultim di al festival da la chanzun rumantscha a Zuoz ha cumenzà gia baud puspè cun chant en baselgia San Luzi. Durant il di hai lura dà puspè chant spontan a Zuoz da diversas furmaziuns. Il punct culminant è dentant stada la concurrenza da cumposiziun cun trais chors ad hoc che han preschentà las cumposiziuns en las categorias chors virils, chors maschadads e chors d’uffants e giuvenils. Cun la rangaziun e l’act final è lura ì a fin quest festival vers saira.
Concurrenza dominada dals umens
In dals puncts culminants dal festival da la chanzun rumantscha a Zuoz è la concurrenza da cumposiziun la dumengia suentermezdi, organisada da l'Uniun da la chanzun rumantscha. 52 cumposiziuns èn vegnidas inoltradas per la concurrenza. I vegn a dar in cumbat en ina bastiun virila.
Fascinaziun per la segunda ediziun
Il president da l’Uniun da la chanzun rumantscha, Clau Scherrer è tut intgantà da la purschida variada al Festival da la chanzun rumantscha Zuoz. Quella sa differenzieschia da quella ch’era vegnida organisada a Trun durant l’emprima ediziun dal 2019.
Suns e tuns en l'emissiun «Artg musical»
Ils numerus concerts dal Festival da la chanzun rumantscha a Zuoz, vegni a dar er per tadlar pli tard. Sco ch’il redactur da musica dad RTR, Hugo Schär declera, datti pliras emissiuns ils proxims mais per laschar reviver ils dis da festa en l'Engiadina.
Tge chaussas !
Il secretari da la Lia Rumantscha, Diego Deplazes ha tutgà la noda ed engiavinà l'endretg chavazzin live durant il Festival da la chanzun rumantscha a Zuoz. La chaussa tschertgada era: Il plektron – il guaffen per stimar la ghitarra.
Ultima emprova avant il concert dal Cor Proget 22
Las chantaduras ed ils chantadurs dal Cor Proget 22 han exercità anc ina giada lur quatter chanzuns avant che preschentar ellas avant public. Sut la batgetta da Curdin Lansel han els anc glimà vid pitschens detagls.
Chantar en furmaziuns spontanas
Il star da cumpagnia durant il Festival da la chanzun rumantscha ha era funcziunà en las giassas da Zuoz. Uschia per exempel a Chaunt da Luf cun AC@G – la furmaziun cun Angelo Andina, Luis Cagienard e Nina Grass.
Sul sulet cun ghitarra
Entant che la gronda part da la glieud ha tadlà ils concerts da la concurrenza en baselgia San Luzi, ha Martin Maier da Turitg procurà per trategniment en la tenda. Cun sia ghitarra en maun ha el chantà chanzuns rumantschas. Il text pront sin il visur davant el.
La festa va a fin
Entant ch’i vegn fatg urden a Zuoz, han ils commembers dal Cor viril Guardaval da Zuoz anc temp da chantar a tut pudair tranteren ina chanzun da cumpagnia. Er per els ina finiziun d’ina fin d’emna plain chant, musica e bels inscunters.
Billantscha
Quai èsi stà dal Festival da la chanzun rumantscha a Zuoz. La billantscha è da tuttas varts positiva. Qua suondan anc dapli impressiuns da quests dis.
Il chant liber suenter la gara
Inscunters hai dà numerus durant ils trais dis dal Festival da la chanzun rumantscha. Saja quai durant ils concerts en baselgia, dentant er suenter cun star da cumpagnia. Barbara Camichel ha dirigì il chant liber il venderdi saira.
Fatschas rientas dapertut
Ils chantadurs e las chantaduras dals differents cors han giudì la fin d'emna. Surtut suenter onns cun pli pauc chant. Ina dad ellas Annigna Kenedy, presidenta dal cor maschedà da Zuoz.
Da la glisch a la glisch
Il proxim Festival da la chanzun rumantscha vegn ad avair lieu en Val Lumnezia. Durant l'act final è la festa vegnida surdada ufficialmain al president communal Daniel Solèr. Gia a Zuoz era la Val Lumnezia dentant represchentada bain cul cor viril Val Lumnezia. Els han chantà en baselgia ma era en la tenda da festa sin plaz a Zuoz.
E tge resta – suenter trais dis festival da la chanzun rumantscha?
Per il president dal comité d'organisaziun Curdin Lansel restan surtut bellas regurdientschas che tunan. Guardand enavos saja el stà surprendì da tut il plaschair, da tut la glieud che saja vegnida a Zuoz e da tut la fascinaziun che saja avant maun per la chanzun rumantscha. El saja cuntent d'avair pudì dar puspè in pau oxigen al chant rumantsch suenter ils onns difficils durant la pandemia.
