Il temp avant in tal festival è almain uschè intensiv sco la fin d’emna da la festa. Saja quai l’organisaziun, per gidantras e gidanters ubain per chors artistas ed artists che sa preparan per lur preschentaziuns. Avant il festival faschain mintga di en l’actualitad in sguard sin in auter aspect da la festa musicala a Zuoz.
Ultima glimada pel «cool cor cul cour»
La dumengia dal festival da la chanzun rumantscha vegnan onuradas las trais chanzuns rumantschas 2022. Numnadamain chanta in chor d’uffants, in chor maschadà ed in chor viril quatter differentas chanzuns ed il public decida la chanzun rumantscha per mintga chor. Il chor d’uffants «cool cor cul cour» sut la batgetta da Nina Mayer ha exercità regularmain las quatter chanzuns ch’èn vegnidas cumponidas aposta per il festival. Quellas han differentas melodias e differents idioms. Quai era tenor Nina Mayer ina sfida al cumenzament.
Termin betg ideal
In’autra sfida per la dirigenta dal chor saja la data. Il festival ha lieu l’emprima fin d’emna da las vacanzas da stad. Uschia quinta il chor per quest concert be var 30 empè da var 50 chantaduras e chantadurs. Tuttina saja la motivaziun ed il plaschair grond, per pudair preschentar las chanzuns al public.
Preparà in festival durant la pandemia
Ils organisaturs dal Festival da la chanzun rumantscha a Zuoz hajan pudì profitar da las experientschas dal prim festival che ha gì lieu dal 2019 a Trun.
Il giast spetga in festival autentic, varià ed egualisà. Organisà cun las resursas ch’èn avant maun.
12 chors sa preschentan durant ils trais dis da festa en Engiadina. Causa la pandemia, ha mancà il temp per exercitar. Singuls chors hajan perquai decis da desister d’ina participaziun al festival, uschè il president dal comitè d’organisaziun, Curdin Lansel.
Infrastructura e preparativas per la gronda festa
Il Festival da la Chanzun Rumantscha dals 1-3 da fanadur 2022 a Zuoz, duai attrair radund 1'000 visitaders per di als differents concerts.
Per che las chantaduras ed ils chantadurs hajan er ina bella plattafurma per sa preschentar durant l’occurrenza en l'Engiadina, ha il team d’infrastructura cun il capo Thomas Pinchera anc lavur avant sai.
Palcs, tablas e mussavias
La gruppa da lavur communala saja engaschada ils ultims dis avant la festa cun construir palcs en baselgia, sin Plaz da Zuoz u er vid signalisar ils viadias dal festival en vischnanca.
Ina da las grondas sfidas saja da coordinar e masinar ils visitaders dal Festival da la chanzun rumantscha al dretg lieu. A partir da venderdi mezdi vegn numnadamain il traffic svià ordaifer il minz da Zuoz.
Nus avain pudì profitar ferm da las experientschas che Zuoz ha fatg en connex cun la festa da 100 onns Lia Rumantscha avant trais onns.
La relaziun da Jan Pieterszoon Sweelinck cun Zuoz
Jan Pieterszoon Sweelinck è naschì il 1561 en Ollanda ed era cumponist ed organist. Cun texts dals psalms da la bibla en furma da versins ha el stgaffì chanzuns, sia gronda ovra. Quels cudeschs da chant sa chattan oz be a Zuoz ed a Washington en ils Stadis Unids. Gian Batista Planta ha cumprà quels en Ollanda e purtà a Zuoz, il 1710 èn quellas chanzuns da Sweelinck vegnidas chantadas a chaschun da la Sinoda a Zuoz. Enfin oz ha il chant ina gronda impurtanza per Zuoz.
Quai capita durant il festival
Il program detaglià cun tut ils concerts ed eveniments chattais sin la pagina uffiziala qua.
RTR è per vus da la partida e rapportescha l’entira fin d’emna:
Venderdi:
- Emprimas impressiuns e tuns da l’avertura ed il festival
Sonda:
- Profil cun Ladina Simonelli-Zisler
- Radio live da Zuoz 10-12 uras
- Gratulaziuns live da Zuoz
- Chant e musica sin plazzas
- Radio live da Zuoz 17-18 uras
Dumengia:
- Radio Live da Zuoz 10-12 uras
- Gratulaziuns live da Zuoz
- Radio Live da Zuoz 16-18 uras
- Publicaziun dals victurs da la «Chanzun Rumantscha»
- Cuntrasts 17:25 sin SRF1
- 20:00 uras Publicaziun video concurrenza da cumposiziun
