La furmaziun «The King’s Singers» è vegnida fundada dal 1968 a chaschun d’in concert en la «London’s Queen Elisabeth Hall». Lur nom deriva dal «King’s Colleges» nua che ils sis fundaturs da la gruppa eran students da quest temp. Era sche nagin dals iniziants n’è betg pli activ en l’ensemble è la tradiziun da lur chant extraordinari vegnida mantegnida fin oz.
Esser part dals King's Singers è in enritgiment en plirs reguards. Grazia a mes tschintg cumpogns ha jau emprais ina massa davart creatività, discurrer davant public, mangiar, linguas, café e natiralmain davart il chantar.
Chant «a capella»
Tge è quai atgnamain? Il term «a capella» s’orientescha a l’expressiun taliana «alla capella». Uriundamain sa tractava pia da chant orientà a la baselgia cura ch’i vegniva discurrì da quest term. Cun ir dals onns ha questa muntada dentant sa midada. Sch’ins discurra oz dad «a capella» manegian ins chant senza accumpagnament instrumental. En la scena da pop sa tracta tar quest term da gruppas che chantan arranschaments nua che tut las parts instrumentalas vegnan imitadas cun la vusch.
Dapli musica da chors
Tge è lur marca?
La vasta paletta da stils è segir ina da las specialitads dals «King’s Singers». Da litteratura da la renaschientscha enfin tar chanzuns or da la scena da pop modern cuvran els pli u main tut ils stils da musica vocala. Lur program da concert actual che sa numna «Legacies» è in uscheditg spievel da questa marca. Cun differents stgazis musicals celebreschan els differentas contribuziuns dals ultims 500 onns istorgia da musica.
La part teatrala da lur concerts è ina ulteriura atgnadad da la gruppa. Ils concerts dals «King’s Singers» n’èn bunamain mai be musica. Cun lur moderaziuns originalas e lur parts da trategniment valan els sco excellents chantadurs ed acturs en ina.
Dapli dals King's Singers datti qua:
En noss archiv da musica èn da chattar nundumbraivlas registraziuns da chors - en spezial chors rumantschs e grischuns.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.