Il num King's Singers deriva dal «King's College» a Cambridge. Ils sis commembers originals dals King’s Singers (Martin Lane, Alastair Hume, Alastair Thompson, Richard Salter, Simon Carrington e Brian Kay) eran tuts en il chor dal King’s College, ina part da la Cambridge University. Quai signifitgava ch'els chantavan durant lur studi en il chor dals servetschs divins quotidians en la chaplutta dal King's College. Quest'experientscha ha motivà ils sis umens giuvens da cumenzar a chantar l'emprim anc separadamain in da l'auter, pli tard lura da cuminanza. L'emprima registraziun è da l'onn 1965 sut il num da gruppa cumplitgà «Scola Cantorum Pro Musica Profana in Cantabridgiense». Questa registraziun è vegnida ad ureglia al dirigent renumà Sir Neville Marriner ch'ha envidà els ad in concert l'avust 1966.
Emprims onns
L'emprim concert sut il num «King's Singers» han els dà il prim da matg 1968 en la Queen Elizabeth Hall a Londra ensemen cun l'Academy of St. Martin in the Fields, Simon Preston (orgla) e Barry Tuckwell (corn). Intgins mais suenter hai dà las emprimas midadas aifer l'ensemble. Ils emprims onns è la furmaziun sa preschentada per gronda part en la Gronda Britannia, singuls concerts han els era dà en auters pajais da l'Europa e quai sco segunda occupaziun. Il 1972 èn els lura sa decidids da far quai sco emprima professiun suenter ch'els han survegnì l'offerta da far ina turnea cun 35 concerts tras l'Australia e la Nova Zelanda. Quai è lura era stà l'entschatta da lur success internaziunal. Ils proxims decennis han els survegnì pliras distincziuns (plattas dad aur).
Durant ils passa 50 onns dals King's Singers hai adina puspè dà midadas aifer la furmaziun. Fin oz datti 28 commembers uffizials da l'ensemble. Da numnar en spezial èn Alastair Hume e Simon Carrington che han sco commembers fundaturs chantà passa 25 onns en l'ensemble sco era David Hurley che ha chantà dal 1980 fin il 2016.
Enconuschents èn ils King's Singers per lur tun d'ensemble spezial. Dus cuntratenors, in tenor, dus baritons ed in bass dattan dapli volumen da tun en las vuschs bassas e procuran uschia per il tun caracteristic da la gruppa.
Oz
La furmaziun actuala èn Patrick Dunachie, Edward Button, Julian Gregory, Christopher Bruerton, Nick Ashby e Jonathan Howard. Cun il Novzelandais Bruerton (dapi il 2012) è per l'emprima giada ina chantadur commember che na deriva betg da la Gronda Britannia.
Passa la mesadad da l'onn èn ils King's Singers sin viadi cun dar concerts en l'entir mund. Per regla producescha l'ensemble in nov portatun ad onn.
L'entschatta dal 2024 concerteschan il King's Singers er a Cuira (en il rom da la Concurrenza da chors svizra ).
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.