Cun «The Code» n’ha Nemo betg be persvas la giuria Svizra mabain era quella da l’ESC ed il public ed uschia gudagnà la 68avla ediziun. Or da quest motiv vegn la proxima ediziun ad avair lieu en Svizra. Bainprest tschertga la Svizra gia puspè la proxima candidata u candidat per quai eveniment musical.
Differentas giurias decidan
Sco gia dapi plirs onns vegn la contribuziun svizra selecziunada en in process cun plirs stgalims. Ina giuria dal public consista d'aspectaturas ed aspectaturs svizzers ed internaziunals. Quella giuria vegn cumplettada cun ina giuria che sa cumpona da 25 experts ed expertas da differents pajais che sa participeschan a l’Eurovision Song Contest.
Sco gia l’onn passà collavura SRF per la selecziun cun l’institut da perscrutaziun dal martgà Yougov (pli baud LINK). Tut ils detagls davart l’annunzia e la selecziun chattais en il reglament da SRF.
Communicaziun a l’entschatta da l’onn proxim
La chanzun selecziunada e l’artista u l’artist che vegnan a preschentar quella vegnan publitgads a l’entschatta dal 2025. Avantatg per l’ediziun en l’atgna tiara: L’act svizzer è directamain qualifitgà per il final.
La selecziun sco era l’accumpagnament da l’act svizzer a l’Eurovision Song Contest 2025 vegn realisà communablamain da SRF, RTS, RSI ed RTR.
