Grazia a la victoria da l'artist Nemo vegn la proxim'ediziun da l'Eurovision Song Contest (ESC) ad avair lieu en Svizra. La dumonda è uss mo pli en tge citad. Fin venderdi, ils 28 da zercladur, han citads gì la pussaivladad d'inoltrar lur dossier per ina candidatura. Quatter citads han la finala s'annunzià: Basilea, Genevra, Turitg e Berna. Tgi che ha la finala l'onur, duai esser cler la fin d'avust.
Basilea vul realisar il spectacul musical
Sco davos dals quatter chantuns ha uss era Basilea annunzià uffizialmain sia candidatura per organisar l'auter onn l'ESC. Tenor ils plans duai l'event avair lieu en la «Sankt-Jakobshalle». En il stadion da ballapè – ch'è dasperas – duai dar in public viewing.
Genevra – era la Svizra franzosa ha interess
Era Genevra ha uffizialmain inoltrà sia candidatura per la 69avla ediziun da l'ESC da l'auter onn. La citad ed il chantun han inoltrà in dossier cuminaivel. En quel fa Genevra attent a sia infrastructura en il cumplex Palexpo, sia rait da viafier, ses eroport e sia spierta da hotels. Vitiers ha la regenza genevrina sincerà da sa participar cun 30 milliuns francs a l'organisaziun da l'ESC 2025.
Turitg sa vesa sco predestinà
La citad da Turitg ha annunzià da vulair organisar l'ESC 2025. Integrà en l'entir project èn il Hallenstadion, la Landiwiese al Lai da Turitg e la chasa da congress. Las shows duain avair lieu en il Hallenstadion che porscha radund 15'000 plazs.
I dat anc bleras dumondas, ma nus sclerin tut quellas a moda fitg seriusa.
Avant aveva il parlament da la citad da Turitg approvà duas moziuns correspundentas. L'incumbensa a la regenza da la citad è stada, d'examinar co ch'ella pudess s'engaschar per ina candidatura da Turitg. La presidenta da la citad Corine Mauch aveva declerà al parlament ch'ins lavuria gia intensivamain e fitg motivà vi da las preparaziuns per ina candidatura.
20 milliuns per il ESC a Turitg
Il parlament da la citad da Turitg ha approvà in credit per organisar il «Eurovision Song Contest» a Turitg. I va per ina contribuziun da 20 milliuns francs. Ina maioritad dal cussegl ha chattà impurtant che la citad prendia enta pugn daners per l'ESC. Quel saja ina schanza unica per Turitg. Cunter il credit è s'exprimida la PPS. Ord vista da la partida populara duaja l'ESC purtar sasez. Da la vart sanestra-verda èsi vegnì exprimì critica en general encunter talas occurrenzas grondas.
Ils Bernais vulan era – cun forzas unidas
Plinavant han Berna e Bienna decidì da candidar communablamain sut il slogan «Bern United». Las duas citads vulan organisar la concurrenza en la nova Berner Festhalle che vegn actualmain construida. Per ulteriuras parts da l'occurrenza pudess star a disposiziun la Tissot Arena a Bienna.
L'ESC 2025 na vegn betg ad avair lieu a Son Gagl. La citad ha retratg lur candidatura pervia da las cundiziuns strictas. Quellas na possia la citad da Son Gagl tenor ina communicaziun betg ademplir.
Il maun public avess gì da surprender custs da 30 fin 40 milliuns francs. Ina candidatura saja pia «actualmain betg realistica».
Reclama ed attenziun internaziunala per la citad elegida
Pervi da l'attenziun internaziunala che l'occurenza da musica porta a la citad elegida – è l'ESC senz'auter d'interess per pliras citads. Candidaturas vegnan acceptadas enfin la fin da zercladur. La decisiun finala nua che la concurrenza vegn ad avair lieu duai lur suandar enfin la fin d'avust. Cura che l'ESC 2025 duai exact avair lieu n'è anc betg cler.