Al festival da chors internaziunal a Kalamata en Grezia ha l’ensemble vocal incantanti gudagnà en la categoria chors da giuvenils. En las categorias musica sacrala e folclora ha il chor da Cuira gudagnà mintgamai in diplom d’aur, quai vul dir, dapli che 20 dals 30 puncts pussaivels. Plinavant ha Christian Klucker, il dirigent da l’ensemble, gudagnà in premi spezial per sias prestaziuns sco dirigent.
Er il Chor da giuvenils grischun ha mussà ina ferma prestaziun ed ha gudagnà dus diploms d’aur en las categorias musica sacrala e chors maschadads. Plinavant ha il Chor da giuvenils grischun gudagnà in premi spezial per la meglra represchentaziun d’ina cumposiziun d'in cumponist grec.
Il victur da la concurrenza è il Chor academic Aarhus dal Danemarc. Quel vala sco in dals megliers chors dal mund.
La citad veglia da Kalamata è quels dis stada transfurmada en ina citad da chors. Chantaduras e chantadurs da tut il mund èn s'inscuntrads ed han chantà in cun l'auter dentant er in encunter l'auter. Tranter ils en tut passa 26 chors da 14 differentas naziuns èn era stads l'ensemble vocal incantanti ed il Chor da giuvenils grischun. Durant ils quatter dis dal festival datti concerts communabels, provas cun dirigentas e dirigents internaziunals e differentas concurrenzas da chors.
Concurrenza en differentas categorias
Concurrenzas datti mintgamai durant ils dis dal festival internaziunal en differentas categorias. Uschia sa mesiran ils chors per exempel en las categorias musica sacrala, folclora, chors da giuvenils, chors da creschids ed uschia vinavant. Ils chors che rimnan ils blers puncts en las categorias han la schanza da chantar en il grond final cun ils megliers chors. La fin datti lura in victur. Mintga chor veglia mussar ses meglier chant ed er represchentar sia cultura da chant, ma en il center dal festival stettia il plaschair, quai ha ditg Flurin Clalüna che chanta en il Chor da giuvenils dal Grischun. I saja interessant da tadlar tiers a chors dad auters pajais ed uschia udir e vesair lur cultura da chant. Plinavant saja il festival internaziunal er ina buna chaschun da sa barattar cun chantaduras e chantadurs dad auters pajais ed er da explorar la citad da Kalamata.
