Nov cudesch d'Arnold Spescha - L'amur per la lingua en poesias
La lingua ha adina accumpagnà l'autur Arnold Spescha. Ses patratgs ha el publitgà en ses nov cudesch: «Sinzurs el serein dalla sera». El tematisescha tant sia amur per la lingua sco era l'atun da la vita.
Dapi 50 onns scriva l'autur Arnold Spescha diari. Dapi lura cun il medem stilograf en blau azur. Tut quai che fatschenta el, chatta la via da la tinta sin il palpiri.
Jau scriv diari per retegnair il temp. Quel passa pli e pli spert, ma cun scriver poss jau franar in zic il temp.
En ses diaris naschan savens era poesias. Igl è gia il terz cudesch da poesias che l'um dad 82 onns preschenta. Suenter la musica e l'aura è ussa la lingua il tema principal: «Sinzurs el serein dalla sera» sa numna la nova ovra da l'autur che viva a Cuira.
Jeu less semiar ils plaids
Avrir la boxSerrar la box
Jeu less semiar ils plaids
sco steilas vid il tschiel
e metter els en ponns
da launa loma caulda
pils dis cun neiv
che sgrezia sut ils peis
extract ord il cudesch da poesias d'Arnold Spescha
Il cudesch tematisescha era l'atun da la vita. Cun poesias sco «tschocs» ubain «suords» er il burdi dals onns vivids.
Mia poesia preferida ha num «viers sera». Ella mussa che jau sun conscient da questa nova spassegiada da la vita che va vers saira, ed jau sun cuntent cun ella.
Viers sera
Avrir la boxSerrar la box
Gl'atun spassegiava
cun pass carmalont
tras la tiara e deva
colur allas caglias
e plontas
cu jeu reteniu hai
miu pass e persenn
hai jeu fatg ch'ei gia mava
cun pass da furtina
viers sera
extract ord il cudesch da poesias d'Arnold Spescha
