Da temp en temp preschenta l'Artg musical in instrument u ina gruppa d'instruments. Questa giada è la flautista professiunala Riccarda Caflisch vegnida en il studio da RTR per preschentar la flauta traversa sco era la famiglia da flautas.
Istorgia da la flauta traversa
Flautas traversas datti gia dapi circa 900 onns avant Cristus en la China, l'Egipta e pli tard tar ils Etruscs. Era en la Germania hai gia baud dà las flautas traversas che vegnan er numnadas en l'istorgia da musica «flauto allemande», «flute allemande» u «german flute». Il 17avel tschientaner è s'envidada ina midada, ina separaziun en la moda e maniera da construir las flautas. Ord la flauta enconuschenta è sa sviluppada ina flauta traversa per il diever en la musica d'art. Entras bleras emprovas cun clappas èsi grategià il 1832 a Theobald Böhm da construir ina flauta sin ina moda dal tuttafatg nova. Questa moda da Böhm (la flauta da Böhm) vala da principi fin oz.
Flautas fitg veglias han ins er chattà en il Grischun, en la claustra Son Jon a Müstair. Questas flautas èn ord oss nursa u chaura ed èn dal temp caroling (8avel u 9avel tschientaner). In ami da Riccarda Caflisch è spezialist da reconstruir instruments istorics. El ha perquai prendì las mesiras da questas flautas dad oss da Müstair e «copiar» ellas cun agid da la tecnica 3D. Uschia ha Riccarda Caflisch er ina flauta dad oss ed ha schizunt cumponì in toc per quella.
Famiglias da flautas
Las flautas da lain (flautas da bloc) tutgan tar in'autra famiglia da flautas che las flautas traversas, tuttina datti parallelas. Tar las flautas da lain datti la flauta sopran, alt, tenor e bass ed era tar las flautas traversas, ch'èn ord metal, datti la flauta piccolo, la flauta sopran (flauta en C, ca. 68 cm lunga), la flauta alt (flauta en G, ca. 86 cm lunga) e la flauta bass ch'è in'octava pli bassa che la flauta en C. Vitiers tutga en la famiglia da flautas traversas er anc la flauta d'amore (en B), la contraflauta alt e la flauta contrabass e subcontrabass.
Las diversas flautas
-
Bild 1 von 10Legenda: Riccarda Caflisch cun sia flauta traversa. RTR -
Bild 2 von 10Legenda: La flauta traversa da lain, l'antecessura da la flauta traversa moderna. RTR
-
Bild 3 von 10Legenda: Riccarda Caflisch sun la flauta traversa alt. RTR
-
Bild 4 von 10Legenda: La flauta traversa bass, la pli gronda flauta traversa. RTR
-
Bild 5 von 10Legenda: Trais soras da la flauta traversa: piccolo, alt e bass RTR
-
Bild 6 von 10Legenda: Duas flautas ord ies exponidas en la claustra Son Jon a Müstair. Ellas èn ord ies d'ina nursa u chaura. RTR, Selina Planta
-
Bild 7 von 10Legenda: Riccarda Caflisch suna la flauta dad ies sco ina flauta da bloc. RTR
-
Bild 8 von 10Legenda: Las flautas dad ies èn ord il temp caroling, 8avel u 9avel tschientaner. RTR, Selina Planta
-
Bild 9 von 10Legenda: Flauta dad ies, flauta traversa e flauta da bloc. RTR
-
Bild 10 von 10Legenda: Riccarda Caflisch suna la flauta dad ies sco ina flauta traversa. RTR
Construcziun
La flauta traversa ha trais parts: chau, part amez e pe. Il chau consista ord il bischen cun la rusna per suflar en l'aria. La part a mez è la part mechanica cun 13 rusnas cun clappas ed il pe è il toc a la fin da la flauta. Là datti in pe en C ed in pe en H, ch'è in zic pli lung. Tar ina flauta cun il pe en C è il pli bass tun il C, tar quella cun pe da H è il pli bass tun il H.
Las flautas da standard vegnan construidas ord metal, pil pli in liament (Legierung) da divers metals (savens arom, zink u nichel) e la surfatscha vegn argientada. Per ina tala flauta pajan ins radund 1'200 francs. Instruments pli chars consistan per gronda part ord argient u schizunt aur e quests custan plirs millis francs u schizunt plirs dieschmilli francs. La flautista Riccarda Caflisch, che dat er uras da flauta, cusseglia a ses scolars da l'emprim prender a fit ina flauta avant che cumprar ella.
Er l'emissiun Minisguard è s'occupada cun la flauta traversa ed ha medemamain discurì cun Riccarda Caflisch.
Stils da musica
La flauta traversa è atgnamain a chasa en mintga stil da musica. Gia ils vegls pievels enconuschevan la flauta. Durant il temp medieval era la flauta savens er in instrument militaric ch'accumpignava la schuldada. La flauta era dentant er in instrument d'orchester il temp da renaschientscha, baroc e pli tard en la musica classica e romantica. Davent ils onns 1968 vegn la flauta traversa er duvrada en la musica da rock, en spezial da la band britannica Jethro Tull e ses bandleader e flautist Ian Anderson. La flauta traversa vegn adina puspè duvrà per parts solisticas, er en la musica da pop e schlagher.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.