Cumenzà aveva tut, sco tar blers auters, cun instrucziun da flauta. Pli tard ha Flavio Bundi lura midà sin il cornet tar la Musica giuvenila Steilalva sut la direcziun da Clemens Christoffel. Cun 13 onns ha el lura cumenzà a sunar il clavazin tar Clau Scherrer ed uschè daventà organist tar la plaiv da la baselgia catolica a Flem. Sia passiun per il chant da chor ha el scuvert durant ses temp da gimnasi cun esser stà part dal Chor gimnasial sco era dal Chor da giuvenils grischun. Grazia a questas experientschas ha el lura sa deditgà pli e pli al cumponer. Sper il cumponer sa deditgescha el era al diriger. Per il mument diriga el il Chor mischedau Suraua e l'ensemble kontra.cant, in chor ch'el aveva fundà l'onn 2012 per ina retscha da concerts tenor il motto «cant da nadal».
Durant ses temp en il Chor da giuvenils grischun era el schon mintgatant i pau in utschè. El na tutgava betg tar quels che gievan baud a cuz.
Tge è sia marca?
Flavio Bundi scriva principalmain musica vocala. Sper varsaquantas cumposiziuns a capella, scriva el er adina puspè chanzuns da chor cun accumpagnament da clavazin. Tar sias cumposiziuns sa tracta da musica fitg melodiusa che cuntegna adina era dissonanzas. La tscherna dal text saja per el fitg decisiva. Normalmain saja quai l’emprim pass cura ch’el giaja vi d’ina nova cumposiziun.
Ediziun Flavio Bundi sin Spotify
Il text d’ina chanzun sto svegliar emoziuns ni dumondas...
Cun ir vi dal clavazin naschian lura emprims sbozs che pudessan ir a prà cun il cuntegn dal text tschernì. Per el saja il pli central che sias chanzuns sajan chantablas. Ses cumponer sa drizzia perquai adina al nivel dal chor che duai finalmain interpretar sia musica.
Chantar duai en emprima lingia far plaschair!
Ovras per il Tenebrae Choir
Grazia ad in inscunter da casualitad durant ses temp da studi a Berna ha el emprendì d'enconuscher Tenebrae, in chor englais cun renum internaziunal. Causa quest inscunter ha Nigel Short, il dirigent da Tenebrae, lura incumbensà Flavio Bundi da scriver duas ovras per els a chaschun d'in concert che l'ensemble professiunal ha dà en la Baselgia San Martin a Cuira. Cun grond respect haja el sa mess vi da questa sfida, nua ch’el haja pudì dar en tut si’olma musicala.
L'entir concert da l'ensemble englais:
D’udir quant precis e sil punct che Tenebrae ha interpretà mias cumposiziuns è stà in dals pli bels muments da mia vita!
