Il 2024 è in onn da giubileums istorics: Il chantun Grischun festivescha 500 onns dapi che las Trais Lias èn sa colliadas al « Freistaat » ed ina da las trais lias, la Ligia Grischa, festivescha 600 onns dapi ch'ella è vegnida fundada da nov a Trun sut igl ischi .
Il chor viril Ligia Grischa e ses dirigent Christoph Cajöri han vulì far per quest giubileum in concert tut spezial. Sut il motto «La Ligia Grischa sin viadi historic» è il chor ensemen cun il istoricher Adolf Collenberg, in quartet da clarinettas cun Heinrich Mätzener, Rahel Trinkler, Josias Just e Dani Häusler ed il percussiunist Robin Mittner sa mess sin ina turnea da concerts. Ils quatter lieus da concert Trun, Glion, Domat e Mesocco èn da gronda muntada istorica.
Els preschentan in program da concert cun chanzuns e contribuziuns istoricas davart la Ligia Grischa.
L'Artg musical porta il concert dals 27 d'avrigl 2024 en la baselgia parochiala son Martin a Trun.
Musica da Dvorak e Delius
Sper il concert dal chor viril Ligia Grischa porta l'emissiun anc duas autras ovras. La poesia sinfonica «Das goldene Spinnrad» (op. 109) da Antonin Dvorak e «Idyll» per sopran, bariton ed orchester dal cumponist Frederick Delius.
«Das goldene Spinnrad» sa basa sin la paraula da Karel Jaromir Erben. Il cuntegn è atgnamain la paraula da la Tschenderletga (Aschenbrödel) nua ch'in retg vul maridar Dorincka, la madregna e sia figlia emprovan dentant d'impedir quai.
L'ovra «Idyll» (Once I passed through a populous city) è ina da las ultimas ovras da Frederick Delius . Il 1932, dus onns avant sia mort, ha el cumponì l'ovra. Perquai ch'el era gia fitg malsaun n'ha el betg pli pudì scriver sez las notas.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.